“Hamma narsa vayron bo‘lgan, hayot deyarli yo‘q” — Zelenskiy Soledar uchun kechayotgan shiddatli janglar haqida gapirdi

Ukraina prezidenti Vladimir Zelenskiy urushning 320-kuni yakunlari bo‘yicha videomurojaatida Donetsk va Lugansk viloyatlaridagi vaziyatni “eng qaynoq” deb atadi.

Donbass uchun kurash davom etmoqda. Hozir bosqinchilar eng katta kuchlarini Soledarga qaratgan bo‘lsa-da, bu qiyin va uzoq davom etadigan jang natijasi baribir butun Donbassimizni ozod qilish bilan tugaydi.

Baxmutimizni himoya qilayotgan va maksimal matonat ko‘rsatayotgan barcha jangchilarimizga minnatdorlik bildiraman! Bosqinchilarning yangi va hatto qattiqroq hujumlariga dosh bergan Soledardagi barcha jangchilarga rahmat! Bu juda qiyin — u yerda deyarli birorta butun devor qolmagan. U yerda, Soledarda askarlarimizning qat’iyatliligi tufayli biz Ukraina uchun qo‘shimcha vaqt va qo‘shimcha kuchlarga ega bo‘ldik.

U yerda Rossiya nimani qo‘lga kiritmoqchi? Hamma narsa butunlay vayron bo‘lgan, hayot deyarli qolmagan. Ular minglab odamlaridan ayrilgan: Soledar yaqinidagi butun zamin bosqinchilarning jasadlari bilan to‘la va zarbalardan ilma-teshik bo‘lgan. Jinnilik degani mana shunday bo‘ladi, — dedi Zelenskiy.

9-yanvar kuni Ukraina mudofaa vaziri o‘rinbosari Anna Malyar “Vagner” yollanma jangchilarining “eng yaxshi zaxiralari”dan tuzilgan guruhlar Ukraina Qurolli kuchlarining Soledardagi pozitsiyalariga “kuchli hujum” boshlaganini aytgandi. 6 va 7-yanvar kunlari “Vagner” jangchilari Soledar atrofida Ukraina armiyasining mudofaasini yorib o‘tdi, ammo shundan keyin Ukraina kuchlari front chizig‘ini barqarorlashtirishga muvaffaq bo‘ldi.

Mavzuga doir:

• Zelenskiy Rossiyada “yangi safarbarlik jarayonlari” tayyorlanayotgani haqida gapirdi
• Zelenskiy Donbassdagi vaziyatni qiyin va og‘riqli deb atadi