Ukraina harbiy qo‘mondonligi vakillari “Vagner” xususiy harbiy kompaniyasi asoschisi Yevgeniy Prigojinning 11-yanvarga o‘tar kechasi uning bo‘linmalari Donetsk viloyatidagi Soledar shahrini nazorat ostiga olgani haqidagi bayonotiga izoh berdi. Biznesmenning matbuot xizmati u harbiylar qurshovida, go‘yoki, o‘sha shaharda qaziladigan tuz konlarida turgani aks etgan suratlarni e’lon qilgandi.
Ukraina qurolli kuchlari Sharqiy guruhi vakili Sergey Cherevatiy Prigojinning da’volarini yolg‘on deb atadi va jurnalistlarga Bosh shtab e’lon qiladigan tafsilotlarni kutishni tavsiya qildi. Bosh shtabining ertalabki axborotida Soledar Rossiya armiyasi tomonida o‘qqa tutilishda davom etayotgan aholi punktlari qatorida tilga olingan, xolos.
Ukraina qurolli kuchlari Strategik kommunikatsiyalar boshqarmasida quyidagicha izoh berishdi: “Prigojinning joylashgan joyi, aftidan haqiqatga to‘g‘ri kelmaydi, u Soledar konlarida emas. Bu Prigojinning piarchilari tomonidan ichi auditoriyaga qaratilgan va mahbuslar orasidagi katta talafotlarni qandaydir qilib oqlash maqsadidagi axborot-ruhiy operatsiya elementidir”.
Muassasa ijtimoiy tarmoqlarga uchta fotosuratni joyladi. Birinchisida Soledar tuz konlari aks etgan, ikkinchisida esa DXR nazorati ostidagi Vladimirovka qishlog‘i hududidagi g‘orlarni ko‘rish mumkin. Uchinchisi Prigojinning matbuot xizmati tomonidan 11-yanvarga o‘tar kechasi Soledar qo‘lga olingani haqidagi xabar bilan birga e’lon qilingan fotosuratdir. “RIA Novosti” suratda Soledar tuz konlari aks etganini da’vo qilgandi. Ukraina qurolli kuchlari esa bu Vladimirovka hududidagi g‘orlar ekanini aytmoqda.
Soledar — Donetsk viloyatidagi kichik shahar bo‘lib, so‘nggi vaqtlarda u uchun shafqatsiz janglar bormoqda. Uning qo‘ldan boy berilishi Ukraina qo‘shinlari uchun ancha kattaroq bo‘lgan Baxmut shahri mudofaasini qiyinlashtirishi mumkin, unga esa bir necha oylardan buyon rossiyaliklar tomonidan hujum olib borilmoqda.
Izoh (0)