“Vagner” xususiy harbiy kompaniyasi asoschisi Yevgeniy Prigojin da’vo qilishicha, uning bo‘linmalari Donetsk viloyatidagi Soledar shahrini to‘liq nazorat ostiga olgan.
“‘Vagner’ bo‘linmalari Soledarning butun hududini nazorat ostiga oldi. Shahar markazi qurshovga olindi, u yerda janglar olib borilmoqda. Asirlar soni ertaga ma’lum qilinadi. Yana bir marta ta’kidlayman, Soledarga hujumda ‘Vagner’ jangchilaridan boshqa hech qanday bo‘linmalar ishtirok etgani yo‘q”, — deb ma’lum qilgan edi Prigojinning matbuot xizmati 10-yanvar kuni kechqurun.
Amerikaning Urushni tadqiq qilish instituti 10-yanvar kungi ma’lumotida yozishicha, Rossiya qo‘shinlari Soledarni to‘liq istilo qilishga muvaffaq bo‘lganicha yo‘q, chunki shaharda, Prigojinning o‘zi yozganidek, hali ham janglar davom etmoqda. Ko‘cha janglari vaqtida vaziyat juda tez o‘zgarishi mumkinligi tufayli, u yoki bu dahalarni aynan kim nazorat qilayotganini aytishga erta, deb hisoblaydi ekspertlar.
Ukraina rasmiy ma’murlari vaziyatni izohlaganicha yo‘q. Ukraina qurolli kuchlari Bosh shtabining ertalabki axborotida Soledar Rossiya armiyasi tomonida o‘qqa tutilishda davom etayotgan aholi punktlari qatorida tilga olingan, xolos.
Avvalroq Ukraina qurolli kuchlarining Soledarni mudofaa qilayotgan 46-aeromobil brigadasi jangchilaridan biri CNN bilan suhbatda shahardagi vaziyatni “jiddiy” deb atab, “halok bo‘lganlar shunchalik ko‘pki, ularni endi hech kim sanamayapti” degan edi.
Soledar — Donetsk viloyatidagi kichik shahar bo‘lib, so‘nggi vaqtlarda u uchun shafqatsiz janglar bormoqda. Uning qo‘ldan boy berilishi Ukraina qo‘shinlari uchun ancha kattaroq bo‘lgan Baxmut shahri mudofaasini qiyinlashtirishi mumkin, unga esa bir necha oylardan buyon rossiyaliklar tomonidan hujum olib borilmoqda.
Izoh (0)