Россия Мудофаа вазирлиги Соледар тўлиқ эгаллаб олинганини маълум қилди

Россия ҳарбийлари 12 январь куни кечқурун Соледарни тўлиқ назорат остига олди. Бу ҳақда Россия Мудофаа вазирлиги хабар берди.

Шаҳар устидан назорат Артемовск (Бахмут)да Украина қўшинлари таъминотини узиб қўйиш имконини беради, дейилади вазирлик хабарида. Қўшимча қилинишича, сўнгги уч кеча-кундузда Соледар ҳудудида 700 дан ортиқ украиналик ҳарбийлар ва 300 донадан зиёд қурол-яроғ йўқ қилинган.

«Соледар Россия қўшинларининг ҳужумчи ва армия авиацияси, ракета қўшинлари ва артиллерия гуруҳлари томонидан душманга доимий зарбалар берилиши шарофати билан қўлга киритилди. Улар шаҳарда Украина қуролли кучлари позицияларига узлуксиз зарбалар берди ва захираларнинг кўчириб ўтказилиши, ўқ-дорилар билан таъминлаш, душманнинг бошқа мудофаа чизиқларига ўтишга уринишларига йўл қўймади», — дейилади вазирлик хабарида.

«Вагнер» хусусий ҳарбий компанияси асосчиси Евгений Пригожин 11 январга ўтар кечаси унинг бўлинмалари Донецк вилоятидаги Соледар шаҳрини назорат остига олгани ҳақида баёнот берган эди. Бизнесменнинг матбуот хизмати у ҳарбийлар қуршовида, гўёки, ўша шаҳарда қазиладиган туз конларида тургани акс этган суратларни эълон қилганди.

Кейинроқ Украина қуролли кучлари Шарқий гуруҳи вакили Сергей Череватий Пригожиннинг даъволарини ёлғон деб атади ва журналистларга Бош штаб эълон қиладиган тафсилотларни кутишни тавсия қилди.

Соледар — Донецк вилоятидаги кичик шаҳар бўлиб, сўнгги вақтларда у учун шафқатсиз жанглар бормоқда. Унинг қўлдан бой берилиши Украина қўшинлари учун анча каттароқ бўлган Бахмут шаҳри мудофаасини қийинлаштириши мумкин, унга эса бир неча ойлардан буён россияликлар томонидан ҳужум олиб борилмоқда.