“Rossiya ataylab axborot shovqini tarqatmoqda”: Ukraina QK Rossiya qo‘shinlari Soledarni egallaganini rad etdi

Rossiya Mudofaa vazirligi rus harbiylari 12-yanvar kuni kechqurun Soledarni to‘liq nazorat ostiga olganini ma’lum qildi. Ukraina qurolli kuchlari mazkur ma’lumotni rad etdi. Bu haqda Deutsche Welle xabar berdi.

Ukraina qo‘shinlarining sharqiy guruhi matbuot kotibi Sergey Cherevatiy Rossiyaning shaharni nazoratiga olganini rad etdi.

“Soledarda janglar davom etmoqda, bizning qo‘shinlarimiz ‘Vagner’ va boshqa eng yaxshi harbiylarini to‘plagan Rossiyaga qarshi saf tortmoqda. Rossiya tomoni ataylab axborot shovqini tarqatmoqda, shu tariqa Ukraina aholisida tushkunlikni keltirib chiqarishga harakat qilmoqda. Bunday qilish kerakmas”, — dedi Cherevatiy.

Rossiya Mudofaa vazirligi Soledar shahri 12 yanvar kuni kechqurun Rossiya kuchlari nazoratiga o‘tganini ma’lum qildi.

“Soledar Rossiya qo‘shinlarining hujumchi va armiya aviatsiyasi, raketa qo‘shinlari va artilleriya guruhlari tomonidan dushmanga doimiy zarbalar berilishi sharofati bilan qo‘lga kiritildi”, — deyilgan xabarda.

Soledarning qo‘lga olingani haqida Rossiya kuchlari avval ham xabar bergan, ammo keyinchalik bu xabarlar rad etilgan.