Ukraina mudofaa vaziri Reznikov mamlakat de-fakto NATO a’zosiga aylanganini aytdi

Ukraina Shimoliy Atlantika alyansi(NATO)ga hali yuridik jihatdan qo‘shilmagan bo‘lsa-da, alyansning de-fakto a’zosiga aylangan. Bu haqda Ukraina mudofaa vaziri Aleksey Reznikov BBC’ga bergan intervyusida aytdi.

“Davlat sifatida Ukraina va Ukraina Qurolli kuchlari NATO a’zosiga aylandi. De-fakto, lekin de-yure emas. Chunki bizda qurollar va ulardan qanday foydalanish bo‘yicha tushuncha bor. Ishonchim komilki, yaqin kelajakda NATOning de-yure a’zosiga aylanamiz”, — dedi Reznikov.

Reznikov uning bayonoti nafaqat Rossiyada, balki NATO davlatlari orasida ham norozilikka sabab bo‘ladi, degan fikrga qo‘shilmadi. “So‘zlarimda nima noaniq? Bu haqiqat. Bu fakt”, — dedi Reznikov.

Shuningdek, u Ukraina G‘arbdan tanklar, jangovar samolyotlar va uzoq masofaga uchuvchi raketalar olishiga ishonch bildirdi, chunki G‘arb davlatlari Ukraina Qurolli kuchlarini qurol-yarog‘ bilan ta’minlash masalasida o‘z fikrini o‘zgartira boshlagan.

Bundan tashqari, Ukraina mudofaa vaziri bahorda jangovar harakatlar kuchayishini ma’lum qildi. “Biz ularning hujumga tayyorlanayotganini bilamiz, albatta, biz ham hujumga tayyor bo‘lishimiz kerak”, — dedi Reznikov.

Biroq u Rossiya armiyasining yana Belarus hududidan hujumga o‘tishi haqidagi taxminni rad etib, bunday operatsiyani tayyorlash vaqt va resurslar talab qilishini tushuntirdi, uning so‘zlariga ko‘ra, hozirda Rossiya armiyasida bular yo‘q.

Dekabr oyida Ukraina Qurolli kuchlari bosh qo‘mondoni Valeriy Zalujniy Rossiya go‘yoki 2023-yilning birinchi oylarida Ukrainaga yangi hujum uyushtirmoqchi ekanini aytgandi. Shu bilan birga, Ukraina harbiy razvedkasi rahbari Kirill Budanovning so‘zlariga ko‘ra, Ukraina tomoni ham o‘z hujumlarini rejalashtirmoqda.

Yanvar oyi boshida ayrim G‘arb davlatlari Ukrainaga keng ko‘lamli urush boshlanganidan beri so‘ralayotgan tanklarni yetkazib berishga tayyorligini ma’lum qildi. Xususan, Polsha va Buyuk Britaniya tomonidan bu rejalar e’lon qilindi. Ukraina Fransiya va AQSHdan ham yengil tanklar deb ataladigan piyodalar jangovar mashinalarni oladi.

Hozirda eng faol jangovar harakatlar Donetsk viloyatining Soledar shahri yaqinida olib borilmoqda. Taxminlarga ko‘ra, so‘nggi kunlarda rus qo‘shinlari uni deyarli to‘liq qo‘lga kiritishga muvaffaq bo‘ldi, ammo Ukraina shahar uchun janglar davom etayotganini ta’kidlamoqda.