Россия Мудофаа вазирлиги рус ҳарбийлари 12 январь куни кечқурун Соледарни тўлиқ назорат остига олганини маълум қилди. Украина қуролли кучлари мазкур маълумотни рад этди. Бу ҳақда Deutsche Welle хабар берди.
Украина қўшинларининг шарқий гуруҳи матбуот котиби Сергей Череватий Россиянинг шаҳарни назоратига олганини рад этди.
«Соледарда жанглар давом этмоқда, бизнинг қўшинларимиз ‘Вагнер’ ва бошқа энг яхши ҳарбийларини тўплаган Россияга қарши саф тортмоқда. Россия томони атайлаб ахборот шовқини тарқатмоқда, шу тариқа Украина аҳолисида тушкунликни келтириб чиқаришга ҳаракат қилмоқда. Бундай қилиш керакмас», — деди Череватий.
Россия Мудофаа вазирлиги Соледар шаҳри 12 январь куни кечқурун Россия кучлари назоратига ўтганини маълум қилди.
«Соледар Россия қўшинларининг ҳужумчи ва армия авиацияси, ракета қўшинлари ва артиллерия гуруҳлари томонидан душманга доимий зарбалар берилиши шарофати билан қўлга киритилди», — дейилган хабарда.
Соледарнинг қўлга олингани ҳақида Россия кучлари аввал ҳам хабар берган, аммо кейинчалик бу хабарлар рад этилган.
Изоҳ (0)