AQSH prezidenti Jo Bayden Ukrainani qo‘llab-quvvatlashni davom ettirish muhimligini ta’kidladi. Uning fikricha, vaziyat ayni paytda “keskin nuqta”da turibdi. Shuningdek, Amerika yetakchisi Ukrainada Patriot zenit-raketa majmualarini qo‘llash samaradorligini ham qayd etdi.
“Hozirgi paytda Ukrainadagi urush keskin pallada turibdi. Ukrainaliklarga Rossiya tajovuziga qarshi turishda yordam berish uchun bor imkoniyatimizni ishga solishimiz kerak, Rossiya esa o‘z sur’atlarini pasaytirishga intilmayapti”, — dedi Bayden vazirlar mahkamasi a’zolari bilan bo‘lib o‘tgan yig‘ilishda.
AQSH prezidenti Germaniya kansleri Olaf Shols bilan Ukrainaga Amerika va Germaniyada ishlab chiqarilgan Bradley va Marder piyodalar jangovar mashinalarini yuborishga kelishib olganini eslatdi. U AQSH Ukrainaga “havo hududida Rossiya zarbalaridan himoyalanish”da yordam berishni va’da qildi.
Bayden aytishicha, Patriot majmualari allaqachon “ishlamoqda, rossiyaliklar esa buni anglashni boshladi”. Uning so‘zlariga ko‘ra, ular “yaxshi ishlayapti va katta yordam beryapti”. Shu bilan birga, 4-yanvar kuni Ukraina tashqi ishlar vaziri Dmitriy Kuleba Patriot tizimlarini topshirishga tayyorgarlik endigina boshlanganini ma’lum qilgandi.
Eslatib o‘tamiz, bugun, 6-yanvar kuni AQSH Ukrainaga yangi yordam paketi haqida rasman e’lon qilishi kutilmoqda. Habriy ko‘mak hajmi jami 2,85 milliard dollarga teng bo‘ladi. AP qayd etishicha, ushbu yordam paketi AQSH shu paytgacha Kiyevga taqdim etganlari ichida eng yirigi bo‘ladi. Amerika hukumati uni bahor boshigacha yetkazib bermoqchi, chunki o‘sha paytda jangovar harakatlar yana faol bosqichga o‘tishi kutilmoqda.
5-yanvar kuni AQSH prezidenti Jo Bayden Ukrainaga Bradley jangovar mashinalari yuborilishini e’lon qilgan, Germaniya kansleri Olaf Shols esa Marder piyodalar zirhli mashinalari va Patriot majmuasi batareyasi (AQSH tomonidan avvalroq taqdim etilgan bitta batareyaga qo‘shimcha ravishda) yetkazilishini aytgandi.
Avvalroq Bayden oktabr oyida boshlangan 2023-moliya yili uchun 1,7 trillion dollarlik budjet loyihasini imzolagandi. Hujjatga ko‘ra, AQSH mudofaa ehtiyojlari uchun 858 milliard dollar ajratiladi, Ukraina va NATOdagi ittifoqchilar qariyb 45 milliard dollar miqdorida favqulodda yordam oladi. Ushbu mablag‘ning qariyb 9 milliard dollari Ukraina Qurolli kuchlarining turli ehtiyojlari, jumladan, o‘quv mashg‘ulotlari, qurol-yarog‘lar, maoshlar va moddiy-texnik ta’minot uchun yo‘naltirilishi rejalashtirilgan.
Izoh (0)