Vladimir Putinning Rojdestvo kunida yarashuv rejimini joriy qilish haqidagi taklifi — nafas rostlab olish uchun imkoniyatga ega bo‘lishga urinish, dedi AQSH prezidenti Jo Bayden jurnalistning savoliga javob berayotib.
“Putin aytayotgan gaplarga javob berish istagida yonayotganim yo‘q… Mening fikrimcha, u biroz toza havodan nafas olmoqchi”, — dedi Bayden.
Rossiya prezidentining tashabbusini Jo Bayden “g‘alati” deb atadi va Rossiya tomonini Yangi yilda Ukraina fuqarolik infratuzilmasiga zarbalar berishda aybladi.
Rossiya Mudofaa vazirligi 31-dekabr kuni Ukrainaning Rossiya hududiga hujum qilishda foydalaniladigan “zarbdor uchuvchisiz uchar qurilmalar tayyorlashda ishtirok etuvchi mudofaa-sanoat majmuasi obyektlari”ga hamda ular saqlanadigan va uchiriladigan joylarga zarbalar berilganini ma’lum qilgandi.
Avvalroq Ukraina prezidenti Vladimir Zelenskiy Rossiya shu bahona ostida Ukraina va Yevropaga qarshi “tajovuzning yangi to‘lqini”ga tayyorlanayotganini aytgandi.
Dastlab Rojdestvo munosabati bilan yarashuvni patriarx Kirill taklif qilgandi. Putin shundna keyin jangovar to‘qnashuvlar chizig‘i bo‘ylab o‘t ochishni to‘xtatish rejimini joriy qilishni buyurdi va Ukraina tomonini ham shunday qilishga chaqirdi. Rossiya Mudofaa vazirligi topshiriqni bajarishni boshlaganini ma’lum qildi. Ukraina hukumati dastlab tashabbusga ishonchsizlik bilan qaradi. Xususan, Ukraina prezidenti ofisi rahbari maslahatchisi Mixail Podolyak taklifni “surbetlarcha qurilgan qopqon va propaganda” deb atadi. Tashqi ishlar vaziri Dmitriy Kuleba Kiyev tashabbusni jiddiy qabul qilmasligini aytib, Zelenskiy avvalroq “o‘nta qadamdan iborat aniq-ravshan tinchlik formulasini taklif etgani”ni eslatdi. Yevropa tashqi siyosaiy xizmati rasmiy vakili Peter Stano Yevroittifoq e’lon qilingan o‘t ochishni to‘xtatishga ishonch bilan qaramasligini aytdi. Uning fikricha, bu “Rossiyaning zaxiralarni to‘ldirish, qo‘shinlarini qaytadan guruhlash yoki putur yetgan xalqaro obro‘sini qayta tiklashga urinishiga o‘xshaydi”. BMT bosh kotibi vakili Stefan Dyujarrik tashkilot jangovar harakatlarni to‘xtatish ehtimolini doim olqishlashini aytdi. Shu bilan birga, u BMT “bu urushning xalqaro huquq va BMT ustaviga muvofiq yakunlanishi” tarafdori ekanini ta’kidlab, tashkilot bu maqsadga erishishda ko‘mak ko‘rsatishga tayyorligini bildirdi. Shunga qaramay, bir tomonlama sulh rejimi Rossiya kuchlari tomonidan joriy qilinadi. Mamlakat Mudofaa vazirligi xabariga ko‘ra, Putinning taklifi bilan Rossiya qo‘shinlariga 6-yanvar 12:00 dan 7-yanvar 24:00 ga qadar o‘t ochishni to‘xtatish rejimini kiritish buyurilgan.
Izoh (0)