АҚШ президенти Жо Байден Украинани қўллаб-қувватлашни давом эттириш муҳимлигини таъкидлади. Унинг фикрича, вазият айни пайтда «кескин нуқта»да турибди. Шунингдек, Америка етакчиси Украинада Patriot зенит-ракета мажмуаларини қўллаш самарадорлигини ҳам қайд этди.
«Ҳозирги пайтда Украинадаги уруш кескин паллада турибди. Украиналикларга Россия тажовузига қарши туришда ёрдам бериш учун бор имкониятимизни ишга солишимиз керак, Россия эса ўз суръатларини пасайтиришга интилмаяпти», — деди Байден вазирлар маҳкамаси аъзолари билан бўлиб ўтган йиғилишда.
АҚШ президенти Германия канцлери Олаф Шольц билан Украинага Америка ва Германияда ишлаб чиқарилган Bradley ва Мардер пиёдалар жанговар машиналарини юборишга келишиб олганини эслатди. У АҚШ Украинага «ҳаво ҳудудида Россия зарбаларидан ҳимояланиш»да ёрдам беришни ваъда қилди.
Байден айтишича, Patriot мажмуалари аллақачон «ишламоқда, россияликлар эса буни англашни бошлади». Унинг сўзларига кўра, улар «яхши ишлаяпти ва катта ёрдам беряпти». Шу билан бирга, 4 январь куни Украина ташқи ишлар вазири Дмитрий Кулеба Patriot тизимларини топширишга тайёргарлик эндигина бошланганини маълум қилганди.
Эслатиб ўтамиз, бугун, 6 январь куни АҚШ Украинага янги ёрдам пакети ҳақида расман эълон қилиши кутилмоқда. Ҳабрий кўмак ҳажми жами 2,85 миллиард долларга тенг бўлади. АП қайд этишича, ушбу ёрдам пакети АҚШ шу пайтгача Киевга тақдим этганлари ичида энг йириги бўлади. Америка ҳукумати уни баҳор бошигача етказиб бермоқчи, чунки ўша пайтда жанговар ҳаракатлар яна фаол босқичга ўтиши кутилмоқда.
5 январь куни АҚШ президенти Жо Байден Украинага Bradley жанговар машиналари юборилишини эълон қилган, Германия канцлери Олаф Шольц эса Мардер пиёдалар зирҳли машиналари ва Patriot мажмуаси батареяси (АҚШ томонидан аввалроқ тақдим этилган битта батареяга қўшимча равишда) етказилишини айтганди.
Аввалроқ Байден октябрь ойида бошланган 2023-молия йили учун 1,7 триллион долларлик бюджет лойиҳасини имзолаганди. Ҳужжатга кўра, АҚШ мудофаа эҳтиёжлари учун 858 миллиард доллар ажратилади, Украина ва НАТОдаги иттифоқчилар қарийб 45 миллиард доллар миқдорида фавқулодда ёрдам олади. Ушбу маблағнинг қарийб 9 миллиард доллари Украина Қуролли кучларининг турли эҳтиёжлари, жумладан, ўқув машғулотлари, қурол-яроғлар, маошлар ва моддий-техник таъминот учун йўналтирилиши режалаштирилган.
Изоҳ (0)