AQSH Ukrainaga qaroyb 3 milliard dollarlik harbiy yordam yubormoqchi, u bir necha o‘nlab Bradley piyodalar zirhli mashinalarini o‘z ichiga oladi. Bu haqda Associated Press AQSH prezidenti ma’muriyatidagi manbalariga tayanib xabar bermoqda.
Habriy ko‘mak hajmi jami 2,85 milliard dollarga teng bo‘ladi. AP qayd etishicha, ushbu yordam paketi AQSH shu paytgacha Kiyevga taqdim etganlari ichida eng yirigi bo‘ladi. Amerika hukumati uni bahor boshigacha yetkazib bermoqchi, chunki o‘sha paytda jangovar harakatlar yana faol bosqichga o‘tishi kutilmoqda.
Yangi yordam paketi haqida 6-yanvar, juma kuni rasman e’lon qilinishi kerak. Boshqa tafsilotlar oshkor etilmayapti. 5-yanvar kuni AQSH prezidenti Jo Bayden Ukrainaga Bradley jangovar mashinalari yuborilishini e’lon qilgan, Germaniya kansleri Olaf Shols esa Marder piyodalar zirhli mashinalari va Patriot majmuasi batareyasi (AQSH tomonidan avvalroq taqdim etilgan bitta batareyaga qo‘shimcha ravishda) yetkazilishini aytgandi.
Rossiya tomoni G‘arb mamlakatlari tomonidan Ukrainaga qurol-yarog‘ yetkaziliayotganini tanqid qiladi. Kreml aytishicha, bunday xatti-harakatlar Moskvaga Ukrainada o‘z maqsadlariga erishishda xalal bera olmaydi, balki qurolli nizoni yanada cho‘zib yuboradi, xolos.
Avvalroq Bayden oktabr oyida boshlangan 2023-moliya yili uchun 1,7 trillion dollarlik budjet loyihasini imzolagandi. Hujjatga ko‘ra, AQSH mudofaa ehtiyojlari uchun 858 milliard dollar ajratiladi, Ukraina va NATOdagi ittifoqchilar qariyb 45 milliard dollar miqdorida favqulodda yordam oladi. Ushbu mablag‘ning qariyb 9 milliard dollari Ukraina Qurolli kuchlarining turli ehtiyojlari, jumladan, o‘quv mashg‘ulotlari, qurol-yarog‘lar, maoshlar va moddiy-texnik ta’minot uchun yo‘naltirilishi rejalashtirilgan.
Izoh (0)