AQSH prezidenti Jo Bayden bilan uchrashuvda Ukraina prezidenti Vladimir Zelenskiy Kiyevga uzoq masofali ATACMS raketalarini yetkazib berish masalasini ko‘targan. OAVlar shunday qurol yetkazish haqidagi kelishuvlar Zelenskiyning Vashingtonga tashrifidan ko‘zlangan asosiy maqsad bo‘lgani haqida yozgandi. Politico o‘z manbalariga tayanib xabar berishicha, AQSH bunday qurol vaziyat keskinlashishiga sabab bo‘lishi mumkin, degan pozitsiyasini saqlab qolgan va fikrini o‘zgartirmagan.
“HIMARS yetkazib berilishi natijasida o‘yin qoidalari o‘zgardi. Bu Rossiya ularga moslashib olishga muvaffaq bo‘lmaguniga qadar davom etdi... Keyingi bosqichda bizga kattaroq masofali qurol kerak toki to‘rt oy avval, birinchi marta HIMARS’ni qo‘lga kiritganimizda erishgan muvaffaqiyatlarimizni takrorlashimiz uchun. Xuddi shu narsani amalga oshirishimiz mmukin, lekin harakatalr radius kattaroq bo‘lishi kerak”, — degandi Ukraina Milliy xavfsizlik va mudofaa kengashi sobiq kotibi. Politico o‘z maqolasida uning bayonotiga tayanmoqda.
AQSH armiyasining Yevropadagi sobiq qo‘mondoni Ben Xojes ATACMS raketalari aynan hozir zarur bo‘lgan narsa ekanini aytgandi. Uning so‘zlariga ko‘ra, kattaroq masofali qurol Ukrainaga Kerch ko‘prigi, Qrimdagi Rossiya aviabazalari va aloqa liniyalari kabi Rossiyaning muhim pozitsiyalariga hujum qilish imkonini bergan bo‘lardi. Politico yozishicha, Oq uy Ukrainaga ATACMS yetkazib berishdan butunlay bosh tortgan, chunki bu qurolni “vaziyatni keskinlashtiruvchi” deb hisoblaydi.
“Biz Ukrainaga hozir yetkazib berilayotgan qurollardan tubdan farq qiluvchi qurol-yarog‘ni yetkazib berishimiz haqidagi g‘oya NATOning qulashi hamda Yevroittifoq va qolgan dunyoning parchalanib ketishi istiqbollariga ega bo‘lgan bo‘lardi”, — degan edi Bayden Zelenskiy bilan qo‘shma matbuot anjumanida. Uning so‘zlariga ko‘ra, NATO va Yevroittifoq “Rossiya bilan urushga qo‘shilmoqchi emas va uchinchi jahon urushi boshlanishini istamaydi”.
Eslatib o‘tamiz, Vladimir Zelenskiy 21-dekabr kuni e’lon qilinmagan tashrif bilan Vashingtonga keldi. Tashrif doirasida Amerika yetakchisi bilan muzokaralar o‘tkazdi, shuningdek, AQSH Kongressida nutq so‘zladi.
Keyinroq esa The Washington Post gazetasi Zelenskiy AQSHga tashrifidan ko‘zlangan maqsadga erisha olmagani, u hujum operatsiyalarini olib borish uchun zamonaviyroq qurol-yarog‘lar olishni rejalashtirgani haqida yozgandi.
Izoh (0)