AQSH hukumati yangi harbiy yordam paketi doirasida Ukrainaga Bradley jangovar mashinalarini yuborish imkoniyatini muhokama qilmoqda. Bu haqda Bloomberg o‘z manbalariga tayanib xabar berdi.
Manbalarga ko‘ra, yakuniy qaror qabul qilinganicha yo‘q. Agar u ijobiy bo‘lsa, Kiyev qachon jangovar piyoda mashinalaridan foydalanishni boshlashi aniq emas.
Bradley jangovar mashinalari piyoda askarlar va razvedkachilarni tashishga mo‘ljallangan. Oq uy ularning yuborilishi ehtimoli yuzasidan izoh berganicha yo‘q.
O‘tgan hafta AQSH Kongressiga 2023-moliya yili uchun budjet haqidagi qonun loyihasi kiritildi, u Ukrainaga yana 44,9 milliard dollarlik yordamni o‘z ichiga oladi. 2022-yilda Kiyev jami 120 milliard dollardan ortiq hajmda yordam qabul qildi. Ukraina hukumati Vashington 2023-yildan keyin Kiyevni qo‘llab-quvvatlashni to‘xtatishi mumkinligini taxmin qilmoqda.
Avvalroq Ukraina AQSHdan ATACMS raketalarini so‘ragani, biroq rad javobini olgani xabar berilgandi. AQSH prezidenti Jo Bayden bilan uchrashuvda Ukraina prezidenti Vladimir Zelenskiy Kiyevga uzoq masofali ATACMS raketalarini yetkazib berish masalasini ko‘targan. AQSH bunday qurol vaziyat keskinlashishiga sabab bo‘lishi mumkin, degan pozitsiyasini saqlab qolgan va fikrini o‘zgartirmagan.
Izoh (0)