AQSH prezidenti Jo Bayden oktabr oyida boshlangan 2023-moliya yili uchun 1,7 trillion dollarlik budjet loyihasini imzoladi. Bu haqda Oq uy matbuot xizmati xabar berdi.
Twitter’dagi postida Amerika prezidenti ushbu qonun loyihasi “tarixiy taraqqiyot yilining toji” ekanini ta’kidladi. Hujjat tibbiy ilmiy-tadqiqot muassasalarini ta’minlash, ayollarga nisbatan zo‘ravonlikka qarshi kurash, Ukrainaga zaruriy yordam ko‘rsatish va hokazolarni nazarda tutadi, deya eslatdi u.
Hujjatga ko‘ra, AQSH mudofaa ehtiyojlari uchun 858 milliard dollar ajratiladi, Ukraina va NATOdagi ittifoqchilar qariyb 45 milliard dollar miqdorida favqulodda yordam oladi. Ushbu mablag‘ning qariyb 9 milliard dollari Ukraina Qurolli kuchlarining turli ehtiyojlari, jumladan, o‘quv mashg‘ulotlari, qurol-yarog‘lar, maoshlar va moddiy-texnik ta’minot uchun yo‘naltirilishi rejalashtirilgan. Deyarli 12 milliard dollar AQSH prezidenti tomonidan Ukrainaga yuborilgan Amerika uskunalari va jihozlarini Pentagon zaxiralari hisobidan to‘ldirishga sarflanadi.
Bundan tashqari, u Ukraina hukumatiga 13 milliard dollar iqtisodiy yordam beradi. Boshqa mablag‘lar insonparvarlik va infratuzilma ehtiyojlarini qondirish, shuningdek, Yevropa qo‘mondonligi operatsiyalarini qo‘llab-quvvatlash uchun sarflanadi.
Izoh (0)