“Vagner” xususiy harbiy kompaniyasi tarkibida Ukrainada jang qilgan mahbuslarning birinchi guruhi yarim yillik shartnoma tugaganidan keyin afv etildi, deb xabar beradi “RIA Novosti” guruh asoschisi Yevgeniy Prigojinga tayanib.
Sobiq mahbuslardan iborat birinchi guruhda qariyb 20 kishi bor. Ularning ism-shariflari, nima uchun sudlangani ma’lum qilinmayapti. Sudlanganlikning bekor qilingani haqida Prigojinning gaplaridan ma’lum bo‘lgan, xolos.
Shuningdek, “RIA Novosti” biznesmen kamuflyaj kiygan odamlarning qo‘lini siqib, “shartnomani o‘tab bo‘lgani” bilan tabriklayotgani aks etgan videoni e’lon qildi.
“O‘z shartnomalarini sharaf bilan o‘tashdi, munosib ravishda, birinchilardan bo‘lib… Birinchilar. Shunday o‘tab berishdiki, buni ko‘pchilik eplay olmaydi… Jamoatchilik ularga juda chuqur hurmat bilan qarashi kerak, qonunlarni esa ular buzmasligi kerak”, — deydi biznesmen rolikda.
Prigojin “o‘ttiz yil o‘tirib”, so‘ng dushmanlar bilan qo‘shib o‘zini portlatib yuborgan va “qahramonlarcha halok bo‘lgan” mahbuslardan birini yodga oldi. “Bu irsiyat… Gormonlar, miya egri chiziqlari va qolgan barcha narsalarning uyg‘unligi”, — dedi “Vagner” asoschisi.
Yollanma jangchilar endi nima bilan mashg‘ul bo‘lishi haqidagi savolga javoban, ortga qaytishini, chunki “ishni davom ettirish — bu hayot” ekanini aytdi.
Video oxirida Prigojin sobiq mahbuslarni “ko‘p ichmaslik”ka, “narkotiklar qabul qilmaslik”ka, “ayollarni zo‘rlamaslik”ka va “sho‘xlik qilmaslik”ka chaqirdi. Ta’kidlanishicha, ularning bir qismi hassalarga tayangan yoki nogironlar aravachasida o‘tirgan holatda bo‘lgan.
Avvalroq Ukraina qurolli kuchlari bosh shtabi rasmiysi, brigada generali Aleksey Gromov Rossiya o‘z yo‘qotishlarini O‘zbekiston va Tojikistondan kelgan mehnat muhojirlari hisobiga to‘ldirayotganini aytgandi.
Shuningdek, Rossiya koloniyalaridagi mahbuslar 2 oy ichida rekord darajada kamayib ketgani, bu ular urushga yollanayotgani bilan bog‘liq bo‘lishi mumkinligi xabar berilgan edi.
Ukraina Qurolli kuchlari Maxsus operatsiya kuchlari qoshidagi Milliy qarshilik markazi ma’lumotlariga ko‘ra, Rossiya Ukrainadagi maxsus operatsiyasiga qamoqxonalarda “Vagner” xususiy harbiy kompaniyasi tomonidan yollangan o‘n minglab askarlarni jo‘natmoqda. Shu paytgacha ular jami 23 ming nafar mahbusni yollagan.
Oq uy Milliy xavfsizlik kengashining strategik aloqalar bo‘yicha koordinatori Jon Kirbi Ukrainadagi urushda qatnashayotgan Vagner jangchilarining taxminan 90 foizi mahbuslar bo‘lishi mumkinligini aytgandi. Kirbining so‘zlariga ko‘ra, Ukrainadagi “vagnerchilar”ning umumiy soni 50 ming kishiga yetishi, ulardan 40 mingga yaqini mahbuslar bo‘lishi mumkin. So‘nggi haftalarda Ukrainada mingga yaqin “Vagner” jangchilari o‘ldirilgan, ularning 90 foizi sobiq mahbuslar bo’lgan.
“Vagner” guruhi o‘zi qanday guruh?
Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.
“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.
U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.
Mavzuga doir:
Izoh (0)