Rossiya koloniyalaridagi mahbuslar 2 oy ichida rekord darajada kamayib ketdi. Bu ular urushga yollanayotgani bilan bog‘liq bo‘lishi mumkin

2022-yil sentabrida va oktabrida Rossiyaning erkaklar uchun axloq tuzatish koloniyalarida mahbuslar soni 23 ming kishiga kamaydi. Bu haqda “Mediazona” Jazolarni ijro etish federal xizmatiga tayanib xabar bermoqda.

Nashr e’tibor qaratishicha, avgust boshi holatiga axloq tuzatish koloniyalarida 349 ming kishi saqlangan bo‘lsa, sentabrga kelib, ular ming kishiga kamaygan, bu esa mahbuslar soni pasayishi bo‘yicha ko‘p yillik trendga mos keladi. Ammo oktabr va noyabr boshida keskin kamayish kuzatildi: mahbuslar soni tegishli ravishda 338 ming va 325 minggacha tushib ketdi.

So‘nggi yillarda bunga qiyoslash mumkin bo‘lgan pasayishlar bor-yo‘g‘i ikki marta kuzatilgan: 2015-yil bahorida (o‘shanda G‘alabaning 70 yilligiga bag‘ishlangan amnistiya doirasida ikki oy ichida qariyb 15 ming kishi ozod etilgan) va 2020-yil boshida (koronavirusning birinchi to‘lqini davrida Rossiya sudlari tomonidan kamroq hukmlar chiqarilgan).

“Mediazona” mahbuslar sonining joriy qisqarishi ular “Vagner” guruhi tomonidan urushga yollanayotgani bilan bog‘liq deb taxmin qilmoqda. Uning asoschisi, biznesmen Yevgeniy Prigojin koloniyalarga shaxsan o‘zi borib, mahkumlarga Ukrainadagi jangovar harakatlarda ishtirok etsa, yarim yildan so‘ng afv etilishini va’da qilmoqda.

Vagner guruhi o‘zi qanday guruh?

Ko‘plab G‘arb OAVlari Vagner guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.