Rossiya Ukrainadagi maxsus operatsiyasiga qamoqxonalarda Vagner xususiy harbiy kompaniyasi tomonidan yollangan o‘n minglab askarlarni jo‘natmoqda. Bu haqda Ukraina Qurolli kuchlari Maxsus operatsiya kuchlari qoshidagi Milliy qarshilik markazi xabar bermoqda.
“Istilochilar jami 23 ming nafar mahbusni yollab, ulardan hujumlarda to‘p yemi sifatida foydalanmoqda. Ularning o‘limi Rossiya jamoatchiligida aks-sado bermayapti va shu sababli rossiyaliklarga talafotlar haqida o‘ylamaslik imkonini bermoqda”, — deyiladi xabarda.
Ta’kidlanishicha, dushman tomon “arzon jangchilar hayotini ukrainaliklar hayotiga ayirboshlamoqda” deyish mumkin.
“Bosqinchilar mahbuslardan hujum otryadlarini tuzmoqda, hujum chog‘ida aerorazvedkadan foydalanmoqda, shuning sharofati bilan guruh komandirlari o‘z qo‘li ostidagilar harakatlarini kuzatib bormoqda”, — deya ma’lum qildi Milliy qarshilik markazi.
Markaz urg‘u berishicha, ushbu talafotlar Vagner guruhini odamgarchilikdan chiqarmaydi, chunki malakali shaxsiy tarkib va rahbariyat hujumlarda qatnashmaydi.
Avvalroq Rossiya koloniyalaridagi mahbuslar 2 oy ichida rekord darajada kamayib ketgani, bu ular urushga yollanayotgani bilan bog‘liq bo‘lishi mumkinligi xabar berilgan edi. Shuningdek, Britaniyada “Vagner” guruhi Ukrainadagi xatti-harakatlari tufayli sudga berildi.
“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan. U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan. Mavzuga doir:Vagner guruhi o‘zi qanday guruh?
Ko‘plab G‘arb OAVlari Vagner guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.
Izoh (0)