Respublikachilar partiyasi yetakchisi Kevin MakKartni AQSH Kongressi Vakillar palatasi spikeri etib saylash jarayoni ketma-ket oltinchi marta muvaffaqiyatsiz yakunlandi. Vakillar palatasi a’zolari ikki kundan beri spikerni saylay olmayapti, deb xabar bermoqda Reuters.
Ovoz berishning oltinchi raundi yakuniga ko‘ra, Makkartini 201 nafar respublikachi qo‘llab-quvvatlagan. Unga g‘alaba uchun 218 ta ovoz kerak.
Respublikachilar partiyasining yana bir vakili Bayron Donalds partiyadoshlaridan 20 ta ovoz oldi. Yana bir respublikachi esa aniq bir nomzodni qo‘llab-quvvatlashdan bosh tortdi.
Vakillar palatasidagi demokratlarning barchasi o‘z partiyasi yetakchisi Hakim Jeffrisga ovoz berdi.
Oltinchi muvaffaqiyatsiz raunddan keyin kongressmenlar yangi ovoz berishni 5-yanvar kuni 12:00 ga (Toshkent vaqti bilan 22:00) qoldirishga qaror qildi.
AQSH prezidenti Jo Bayden vaziyatni izohlar ekan, Vakillar palatasi spikerini saylash jarayoni cho‘zilib ketganini sharmandalik deb bilishini, bu muvaffaqiyatsizlik ortidan AQSH Kongressi quyi palatasining faoliyati falajlanganini aytdi.
“Kongress o‘z funksiyalarini bajara olmayotgan bu vaziyat shunchaki sharmandalik. Biz dunyodagi eng buyuk davlatmiz. Qanaqasiga bunday bo‘lishi mumkin?” — dedi Bayden.
Oxirgi marta AQSH Kongressi Vakillar palatasida birinchi urinishda spiker saylay olmaslik holati 1923-yilda sodir bo‘lgan.
Noyabr oyida AQSHda oraliq saylovlar bo‘lib o‘tgandi, uning natijasida respublikachilar Vakillar palatasida 218 ta o‘rinni egallab, uni nazorat qila boshladi. Shundan so‘ng Nensi Pelosining o‘rniga yangi spiker tanlash zarurati yuzaga keldi, chunki Pelosi demokratlar vakili.
Respublikachilar partiyasi endilikda AQSH prezidenti Jo Bayden ma’muriyatining kun tartibiga ta’sir o‘tkazishi mumkin bo‘ladi. Oldingi ikki yilda Kongressning yuqori va quyi palatalarini nazorat qilgan demokratlar respublikachilarning roziligisiz ham istalgan qonun loyihasini qabul qila olgan.
Izoh (0)