Marsda ehtimoliy suv manbai topildi

Curiosity marsoxodi tomonidan Marsni tadqiq qilish bilan o‘tgan o‘n yil mobaynida to‘plangan arxiv ma’lumotlar tahlil qilinishi natijasida Qizil sayyorada ommaviy opal konlari borligi ma’lum bo‘ldi. Bu haqda 3DNews xabar bermoqda.

Bo‘lg‘usi “mustamlakachilar” uchun opal zargarlik bezaklari sifatida emas, balki suv manbai sifatida qiziqdir. Bu Marsdagi bo‘lg‘usi baza taqdiri uchun muhim kashfiyot, deyiladi xabarda.

Ochig‘ini aytganda, Marsda opal konlari mavjudligi haqida 2008-yildayoq Mars Reconnaissance Orbiter orbital qurilmasi yordamida qo‘lga kiritilgan axborotdan ma’lum bo‘lgan edi. Zond Qizil sayyoraning ba’zi mintaqalarida katta oqish dog‘larni aniqlagan, ular gidratatsiya qilingan (suv molekulalari bilan birikkan) kremniy dioksidi (kremnezyom) cho‘kindilari deb taxmin qilingandi. Kremniy dioksidi gidratining o‘zi opal bo‘lib, kremnezyomga boy tog‘ jinslarining suv ta’sirida nurashi jarayonida hosil bo‘ladi. Eritma yoriqlarga va kavaklarga kirib, u yerda qotadi va millionlab yillar davomida qimmatbaho mineralga aylanadi.

Opaldagi suv kristall tuzilma bilan bog‘lanmaydi hamda mineralni maydalash va qizdirish chog‘ida qaytadan ajralib chiqishi mumkin. Curiosity ma’lumotlari tahlili ko‘rsatishicha, uzunligi 1 metr, chuqurligi 30 santimetr bo‘lgan konda 5,7 litrgacha suv bo‘lishi mumkin, bunday konlarga esa marsoxod olimlar kutganidan ko‘ra ancha ko‘proq duch kelgan. Bu Marsni o‘zlashtirish bo‘yicha rejalarni amalga oshirish uchun yaxshi yangilik, deyiladi xabarda.

Avvalroq NASA olimlari Marsda energiya manbayi sifatida foydalanishga yetarli shamol bo‘lishi mumkinligini aniqlagan edi.