Xitoy koronavirusga chalinib kasalxonaga yotqizilganlar va vafot etganlar soni haqida to‘liq ma’lumot bermayapti, dedi Jahon sog‘liqni saqlash tashkiloti (JSST) favqulodda vaziyatlar dasturi ijrochi direktori Maykl Rayan. Uning so‘zlari Financial Times nashrida keltirildi.
“Biz Xitoyda e’lon qilingan joriy ma’lumotlar bemorlarning kasalxonaga yotqizilishi, intensiv terapiya bo‘limlariga yotqizilishi, ayniqsa o‘lim darajasi bo‘yicha haqiqiy ta’sirini to‘liq aks ettirmaydi, deb hisoblaymiz”, — dedi Rayan.
U Xitoy raisi Si Szinpin “COVID-19 uchun nol bardoshlilik” siyosatiga chek qo‘yganidan keyin Pekinni pandemiya ko‘lami haqida shaffofroq bo‘lishga chaqirdi. “Nol bardoshlilik” davrida Xitoyda har bir koronavirus epidemiyasi lokdaun va qattiq cheklovlar orqali bostirilgandi.
Biroq norozilik to‘lqini bu siyosatdan voz kechishga olib keldi va infeksiya tarqalishini tezlashtirdi. Dekabr oyi oxirida FT Xitoy Kasalliklarni nazorat qilish va oldini olish markazi direktori o‘rinbosari Sun Yangga tayanib, cheklovlar bekor qilingandan keyin dekabrning dastlabki 20 kunida 250 millionga yaqin odam yoki aholining 18 foizi koronavirus bilan kasallanganini yozgan edi. Pekinning 22 million aholisidan yarmi infeksiyaga chalingan, deb yozadi The Wall Street Journal.
Ammo 3-yanvarda Xitoy rasman mamlakat bo‘ylab atigi 5 258 ta COVID-o‘lim haqida xabar berdi, jumladan 1-dekabrdan beri 25 kishi vafot etgani aytildi. Pekin COVID-19 holatlari bo‘yicha kundalik ma’lumotlarni e’lon qilishni to‘xtatgan.
Izoh (0)