«Вагнер» хусусий ҳарбий компанияси таркибида Украинада жанг қилган маҳбусларнинг биринчи гуруҳи ярим йиллик шартнома тугаганидан кейин афв этилди, деб хабар беради «РИА Новости» гуруҳ асосчиси Евгений Пригожинга таяниб.
Собиқ маҳбуслардан иборат биринчи гуруҳда қарийб 20 киши бор. Уларнинг исм-шарифлари, нима учун судлангани маълум қилинмаяпти. Судланганликнинг бекор қилингани ҳақида Пригожиннинг гапларидан маълум бўлган, холос.
Шунингдек, «РИА Новости» бизнесмен камуфляж кийган одамларнинг қўлини сиқиб, «шартномани ўтаб бўлгани» билан табриклаётгани акс этган видеони эълон қилди.
«Ўз шартномаларини шараф билан ўташди, муносиб равишда, биринчилардан бўлиб… Биринчилар. Шундай ўтаб беришдики, буни кўпчилик эплай олмайди… Жамоатчилик уларга жуда чуқур ҳурмат билан қараши керак, қонунларни эса улар бузмаслиги керак», — дейди бизнесмен роликда.
Пригожин «ўттиз йил ўтириб», сўнг душманлар билан қўшиб ўзини портлатиб юборган ва «қаҳрамонларча ҳалок бўлган» маҳбуслардан бирини ёдга олди. «Бу ирсият… Гормонлар, мия эгри чизиқлари ва қолган барча нарсаларнинг уйғунлиги», — деди «Вагнер» асосчиси.
Ёлланма жангчилар энди нима билан машғул бўлиши ҳақидаги саволга жавобан, ортга қайтишини, чунки «ишни давом эттириш — бу ҳаёт» эканини айтди.
Видео охирида Пригожин собиқ маҳбусларни «кўп ичмаслик»ка, «наркотиклар қабул қилмаслик»ка, «аёлларни зўрламаслик»ка ва «шўхлик қилмаслик»ка чақирди. Таъкидланишича, уларнинг бир қисми ҳассаларга таянган ёки ногиронлар аравачасида ўтирган ҳолатда бўлган.
Аввалроқ Украина қуролли кучлари бош штаби расмийси, бригада генерали Алексей Громов Россия ўз йўқотишларини Ўзбекистон ва Тожикистондан келган меҳнат муҳожирлари ҳисобига тўлдираётганини айтганди.
Шунингдек, Россия колонияларидаги маҳбуслар 2 ой ичида рекорд даражада камайиб кетгани, бу улар урушга ёлланаётгани билан боғлиқ бўлиши мумкинлиги хабар берилган эди.
Украина Қуролли кучлари Махсус операция кучлари қошидаги Миллий қаршилик маркази маълумотларига кўра, Россия Украинадаги махсус операциясига қамоқхоналарда «Вагнер» хусусий ҳарбий компанияси томонидан ёлланган ўн минглаб аскарларни жўнатмоқда. Шу пайтгача улар жами 23 минг нафар маҳбусни ёллаган.
Оқ уй Миллий хавфсизлик кенгашининг стратегик алоқалар бўйича координатори Жон Кирби Украинадаги урушда қатнашаётган Вагнер жангчиларининг тахминан 90 фоизи маҳбуслар бўлиши мумкинлигини айтганди. Кирбининг сўзларига кўра, Украинадаги «вагнерчилар»нинг умумий сони 50 минг кишига етиши, улардан 40 мингга яқини маҳбуслар бўлиши мумкин. Сўнгги ҳафталарда Украинада мингга яқин «Вагнер» жангчилари ўлдирилган, уларнинг 90 фоизи собиқ маҳбуслар бўлган.
«Вагнер» гуруҳи ўзи қандай гуруҳ?
Кўплаб Ғарб ОАВлари «Вагнер» гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.
«Konkord» компанияси эгаси бўлган Евгений Пригожин 2016 йилдан буён АҚШ, 2020 йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва «Вагнер»ни назорат қилишда айбланган.
У «Вагнер»га алоқадорлигини кўп марта рад этган ва бундай айбловлар сабабли судлашган, аммо 2022 йил сентябрида у «Вагнер» асосчиси эканини маълум қилди. Ташкилотни 2014 йилда, унинг сўзларига кўра, «Донбассда рус халқига нисбатан геноцид» бошланган вақтда тузган.
Мавзуга доир:
Изоҳ (0)