Korrupsiya va uyushgan jinoyatchilikni o‘rganish xalqaro markazi (OCCRP) “Vagner” xususiy harbiy kompaniyasi asoschisi Yevgeniy Prigojinni “Uyushgan jinoyatchilik va korrupsiya” nominatsiyasida “Yil odami” deb e’lon qildi. Bu haqda markaz matbuot-reliziga tayanib, Meduza xabar berdi.
“Yevgeniy Prigojin bu yil Rossiyaning eng dahshatli ishlari jonli ramziga aylandi. Nopok pullar, ibtidoiy zo‘ravonlik, beadablik va hatto Rossiya qonunlari oldida jazosiz qolish — davlat tomonidan tasdiqlangan korrupsiyaning barcha hosilalari uning shaxsida birlashgan”, — deyiladi OCCRP hisobotida.
OCCRP bosh muharriri va hammuassisi Dryu Sallivanning aytishicha, Prigojin bu “mukofot”ga “Rossiyaning shafqatsiz va korrupsion ta’sirini kengaytirishga qaratilgan faoliyati, Vladimir Putin uchun talon-taroj qilishga va muxoliflarni jazolashga tayyorligi” uchun sazovor bo‘lgan.
Markaz hisobotida Prigojin tomonidan yaratilgan “Vagner” guruhiga alohida e’tibor qaratilgan bo‘lib, u “dunyo bo‘ylab mojaro zonalarida qoldirgan qonli izlari bilan tanilgan”i aytiladi. “Vagner’ jangchilari qayerga borsa, o‘sha yerda albatta, inson huquqlari buzilishi kuzatiladi. Suriyadan Kamerungacha, Somalidan Maliga qadar ular zo‘rlash, talonchilik, qotillik va qiynoqlarda ayblanmoqda”, — deyiladi OCCRP hisobotida.
OCCRP 2012-yildan beri uyushgan jinoyatchilik va korrupsiya bo‘yicha “yil odami” mukofotini berib keladi. 2014-yilda markaz ushbu nomga Rossiya prezidenti Vladimir Putinni, 2021-yilda esa Aleksandr Lukashenkoni loyiq deb topgan.
“Vagner” Ukrainadagi urushda boshidanoq qatnashib kelmoqda. Uning yollanma askarlari —aksariyati sobiq mahbuslar ko‘plab harbiy jinoyatlarda ayblanmoqda.
Izoh (0)