Armaniston xalqaro hamjamiyatni respublikani Tog‘li Qorabog‘ bilan bog‘lovchi Lochin yo‘lagining Ozarbayjon tomonidan to‘sib qo‘yilgani faktlarini tekshirish uchun missiya yuborishga chaqiradi. Bu haqda hukumat yig‘ilishida Armaniston bosh vaziri Nikol Pashinyan ma’lum qildi.
“Lochin yo‘lagi blokadasining davom etishi Tog‘li Qorabog‘ va Lochin yo‘lagiga xalqaro faktlarni o‘rganish missiyasini jo‘natish va bu yo‘nalishda doimiy sa’y-harakatlarni amalga oshirish zaruratini yanada kuchaytirmoqda”, — dedi u.
Armaniston Vazirlar Mahkamasi rahbarining ta’kidlashicha, Yerevan xalqaro hamjamiyatdan, jumladan, “BMT Xavfsizlik Kengashining doimiy a’zosi, tinchlikparvar qo‘shinlari Tog‘li Qorabog‘da joylashgan Rossiyadan” Lochin yo‘lagini blokdan chiqarish bo‘yicha yanada samarali qadamlar kutmoqda.
Lochin yo‘lagi Ozarbayjonning Lochin viloyatidan o‘tgan. Bu Armaniston va Tog‘li Qorabog‘ni bog‘laydigan olti kilometrlik avtomobil yo‘li.
12-dekabr kuni o‘zini ekologiya faollari deb tanishtirgan ozarbayjonlik bir guruh noma’lum shaxslar Lochin yo‘lagini to‘sib qo‘ygani xabar qilindi. Armaniston tomoni Boku Uch tomonlama bayonotning oltinchi bandini qo‘pol ravishda buzganini ta’kidladi. Bandga ko‘ra, “Lochin yo‘lagi Rossiya tinchlikparvar kuchlari nazorati ostida bo‘ladi, Ozarbayjon respublikasi esa fuqarolar, transport vositalari va yuk mashinalarning Lochin yo‘lagi bo‘ylab harakatlanishi xavfsizligini kafolatlaydi”.
Yerevan yo‘lakning to‘silishini Boku tomonidan Tog‘li Qorabog‘da gumanitar falokat yaratishga qaratilgan provokatsiya sifatida baholadi. Armaniston bosh vaziri Nikol Pashinyanning aytishicha, yo‘lak to‘sib qo‘yilgani sababli Tog‘li Qorabog‘da oziq-ovqat taqchilligi boshlangan.
Armaniston bosh vaziri, shuningdek, Rossiya tinchlikparvar korpusi kuchlarini o‘z majburiyatlarini bajarmayotgani uchun tanqid qildi.
Izoh (0)