Armaniston bosh vaziri Nikol Pashinyan Ozarbayjon tomonidan Lochin yo‘lagi yopib qo‘yilgani sabab Tog‘li Qorabog‘da og‘ir gumanitar vaziyat yuzaga kelganini ma’lum qildi. Uning so‘zlariga ko‘ra, Armanistonni Qorabog‘ hududi bilan bog‘laydigan yagona yo‘lning to‘sib qo‘yilishi ortidan u yerda oziq-ovqat muammosi boshlangan.
“Bokuning harakatlari noqonuniydir va xalqaro majburiyatlarni, xususan, 2020-yil 9-noyabrdagi uch tomonlama bayonot qoidalarini buzadi”, — dedi Pashinyan Armaniston Vazirlar Mahkamasi majlisida.
Armaniston bosh vaziri, shuningdek, Rossiya tinchlikparvar korpusi kuchlarini o‘z majburiyatlarini bajarmayotgani uchun tanqid qildi. “Albatta, bu Ozarbayjonning harakatlari bilan bog‘liq, ammo bu masalaning mohiyatini o‘zgartirmaydi. Rossiya tinchlikparvar kuchlarining u yerdan bo‘lishidan asosiy maqsad — noqonuniy harakatlarga yo‘l qo‘ymaslik va Lochin yo‘lagini nazorat ostida ushlab turish”, — dedi bosh vazir.
Bundan tashqari, Pashinyan Armaniston Ozarbayjonga mojaroni tinch yo‘l bilan hal qilish bo‘yicha o‘z takliflarini taqdim etganini aytdi. “Biz shu mazmundagi shartnomani imzolashga tayyormiz va umid qilamanki, Ozarbayjonning javobi ijobiy bo‘ladi”, — deya qo‘shimcha qildi u. Shuningdek, uning so‘zlariga ko‘ra, Ozarbayjon tomoniga mintaqaviy kommunikatsiyalarni ochish va chegarani delimitatsiya va demarkatsiya qilish komissiyasining keyingi faoliyati yuzasidan takliflar yuborilgan.
3-dekabr kuni Tog‘li Qorabog‘ vakillari Ozarbayjon harbiylari respublika poytaxti Stepanakertni Armaniston bilan bog‘lovchi Lochin yo‘lagini to‘sib qo‘yganini ma’lum qildi. Rossiya tinchlikparvar kuchlari avtomagistralni ochish uchun muzokaralarga kirishishi kerak edi.
12-dekabr kuni Ozarbayjon fuqarolarining Ozarbayjon nazorati zonasidan tashqaridagi konda qazib olingan rudani mintaqadan eksport qilishni to‘xtatishni talab qiluvchi noroziligi tufayli Lochin yo‘lagi transport harakati uchun yopildi. 13-dekabr kuni Ozarbayjon Armanistondan Tog‘li Qorabog‘ga gaz yetkazib berilishini to‘xtatdi.
14-dekabr kuni Yerevan Inson huquqlari bo‘yicha Yevropa sudiga murojaat qilib, Bokuni Lochin yo‘lagini blokdan chiqarishga majburlashni so‘radi. 20-dekabr kuni BMT Xavfsizlik kengashining yig‘ilishi bo‘lib o‘tdi, unda ishtirokchilar yo‘l to‘siqlarini ochishga chaqirdi.
Izoh (0)