Qozog‘iston prezidenti Qosim-Jo‘mart To‘qayev itlarning tozi va to‘bet deb ataluvchi milliy zotlarini asrash va qayta tiklash to‘g‘risidagi qonunni imzoladi.
Tozi zoti qariyb o‘n uch asrlik tarixga ega, ushbu it zotining ilk tasvirlarini paleolitdan O‘rta asrlar boshlarigacha bo‘lgan davrlarga tegishli petrogliflar — toshlarga tushirilgan rasmlarda uchratish mumkin. Bu zot otlar bilan bir qatorda juda qadrlangan, ocharchilik yillarida ular o‘ljani ovlashga yordam bergan.
To‘bet turkman iti — bo‘ribosarning eng yaqin qarindoshi hisoblanadi. Ular xuddi alabaylar kabi, ko‘p asrlar davomida cho‘ponlarga hamrohlik qilib, suruvlarni bo‘rilardan qo‘riqlagan va hatto ovlarda qatnashgan.
Qozog‘istonda tozi va to‘bet yo‘qolib ketish xavfi ostida turibdi. Asosiy muammo — rus tozisi va afg‘on tozisi kabi zotlar bilan aralashib ketgani. To‘betlar hozirda o‘zlarining asosiy vazifasi(podani himoya qilish, bo‘rilarga qarshi kurash)ni bajarishda deyarli foydalanilmaydi.
Bu zotlarni saqlab qolish uchun Qozog‘istonda maxsus Milliy markaz tashkil etilgan bo‘lib, uning vazifalari ushbu zotlar bo‘yicha mutaxassislarni tayyorlash, itlar ko‘rgazmalari va namoyishlarini o‘tkazishdan iborat bo‘ladi.
Izoh (0)