Арманистон халқаро ҳамжамиятни республикани Тоғли Қорабоғ билан боғловчи Лочин йўлагининг Озарбайжон томонидан тўсиб қўйилгани фактларини текшириш учун миссия юборишга чақиради. Бу ҳақда ҳукумат йиғилишида Арманистон бош вазири Никол Пашинян маълум қилди.
«Лочин йўлаги блокадасининг давом этиши Тоғли Қорабоғ ва Лочин йўлагига халқаро фактларни ўрганиш миссиясини жўнатиш ва бу йўналишда доимий саъй-ҳаракатларни амалга ошириш заруратини янада кучайтирмоқда», — деди у.
Арманистон Вазирлар Маҳкамаси раҳбарининг таъкидлашича, Ереван халқаро ҳамжамиятдан, жумладан, «БМТ Хавфсизлик Кенгашининг доимий аъзоси, тинчликпарвар қўшинлари Тоғли Қорабоғда жойлашган Россиядан» Лочин йўлагини блокдан чиқариш бўйича янада самарали қадамлар кутмоқда.
Лочин йўлаги Озарбайжоннинг Лочин вилоятидан ўтган. Бу Арманистон ва Тоғли Қорабоғни боғлайдиган олти километрлик автомобиль йўли.
12 декабрь куни ўзини экология фаоллари деб таништирган озарбайжонлик бир гуруҳ номаълум шахслар Лочин йўлагини тўсиб қўйгани хабар қилинди. Арманистон томони Боку Уч томонлама баёнотнинг олтинчи бандини қўпол равишда бузганини таъкидлади. Бандга кўра, «Лочин йўлаги Россия тинчликпарвар кучлари назорати остида бўлади, Озарбайжон республикаси эса фуқаролар, транспорт воситалари ва юк машиналарнинг Лочин йўлаги бўйлаб ҳаракатланиши хавфсизлигини кафолатлайди».
Ереван йўлакнинг тўсилишини Боку томонидан Тоғли Қорабоғда гуманитар фалокат яратишга қаратилган провокация сифатида баҳолади. Арманистон бош вазири Никол Пашиняннинг айтишича, йўлак тўсиб қўйилгани сабабли Тоғли Қорабоғда озиқ-овқат тақчиллиги бошланган.
Арманистон бош вазири, шунингдек, Россия тинчликпарвар корпуси кучларини ўз мажбуриятларини бажармаётгани учун танқид қилди.
Изоҳ (0)