Ukraina xalqi AQSH tomonidan qurol-yarog‘ va pul bilan ta’minlanib tursagina jang qila oladi. Sulh masalasi go‘yoki Vashingtonga bog‘liq. Bu haqda Vengriya bosh vaziri Viktor Orban Magyar Nemzet nashriga bergan intervyusida aytib o‘tdi.
Vengriyalik mansabdor ta’kidlashicha, Budapesht 30 yil ichida birinchi marta Ukrainadagi urushga aralashib qolish xavfiga duch kelgan. Uning fikricha, yonilg‘i narxining oshishi ham “mamlakatni xavfli yo‘nalishga boshlamoqda”.
Shuningdek, u urushda avval o‘t ochishni to‘xtatib, shundan keyingina tinchlik muzokaralarini o‘tkazish kerakligini aytdi. Ammo Orban bu masalaga alohida to‘xtalib, aniqlik kiritdi.
“AQSH pul va qurol bilan yordam berib tursagina, Ukraina jang qilishni davom ettira oladi. Amerikaliklar tinchlikni xohlasagina, tinchlik bo‘ladi”, — degan fikrda Vengriya hukumati rahbari.
Shuningdek, u Vengriyaning o‘z alohida pozitsiyasi borligini aytdi. “Biz voqeaning yaxshi tomonida turibmizmi yoki yomon tomonida turibmizmi — degan savolga javob beradigan bo‘lsak, aytishimiz mumkinki, biz vengercha tomonda turibmiz”, — dedi u.
Shu bilan birga, Orban Budapesht Ukrainani qo‘llab-quvvatlab, unga yordam berayotganini ta’kidladi. “Biz suveren Ukraina omon qolishi tarafdorimiz va Rossiya Yevropa xavfsizligiga tahdid solmasligidan manfaatdormiz. Ammo biz Rossiya bilan iqtisodiy aloqalarimizning barchasidan voz kechishdan manfaatdor emasmiz”, — dedi Orban.
Eslatib o‘tamiz, 7-dekabr kuni Yevroittifoq mamlakatlari vakillari o‘rtasidagi uchrashuv chog‘ida Vengriya tomoni Rossiyaga qarshi sanksiyalarning yangi paketiga qarshi chiqqan edi.
Izoh (0)