Belarusning Svetlogorsk shahrida yashovchi uch fuqaro Rossiya harbiy texnikasining Ukraina bilan chegaraga yetib borishini sekinlashtirish maqsadida temiryo‘lda qo‘poruvchilik qilgani uchun uzoq muddatga qamoq jazosiga hukm qilindi. Bu haqda “Gomel bahori” inson huquqlari loyihasiga tayanib, Meduza xabar berdi.
Tergov ma’lumotlariga ko‘ra, Oleg Molchanov, Dmitriy Ravich va Denis Dikun 28-fevral, urushning beshinchi kunida temiryo‘lning Ukrainaga olib boradigan Jerd—Ostankovichi qismida joylashgan boshqaruv tizimi qutisiga o‘t qo‘ygan. Natijada yo‘lning ushbu qismida svetofor va strelkalar vaqtinchalik ishdan chiqqan.
Ayblanuvchilar terrorizm, davlatga xiyonat, aloqa vositalariga qasddan zarar yetkazish va ekstremistik tuzilmada ishtirok etish kabi moddalar bo‘yicha aybdor deb topildi. Sud Molchanovni 21 yilga, Ravichni 22 yilga, Dikunni 23 yilga ozodlikdan mahrum qildi. Bundan tashqari, ularning har biriga 4800 Belarus rubli (1800 dollar) miqdorida jarima solindi va tintuvlar davomida topilgan mol-mulki musodara qilindi.
“Zerkalo” nashri xabariga ko‘ra, bu Belarusdagi temiryo‘lda qo‘poruvchilik qilish holatlari bo‘yicha eng og‘ir jazo hisoblanadi. Shu paytgacha bunday ish bo‘yicha maksimal muddat 16 yillik qamoq jazosi edi.
Rossiyaning Ukrainaga bosqini boshlanganidan keyingi dastlabki haftalarda Belarusda rus harbiy texnikasining olib o‘tilishini sekinlashtirish uchun o‘nlab temiryo‘l sabotajlari uyushtirilgan. May oyida Aleksandr Lukashenko terrorchilik hujumiga urinish uchun jazoni o‘lim jazosigacha qattiqlashtirdi.
Suddan oldin ham Molchanov, Ravich va Dikun Belarus rasmiylari tomonidan tuzilgan “terrorchilar” ro‘yxatiga kiritilgan. Huquq himoyachilari ularni siyosiy mahbuslar deb tan olgan.
Izoh (0)