Agar Gruziya prezidenti Mixail Saakashvili hibsda vafot etsa, Yevroparlament Gruziyaning Yevroittifoq tarkibiga kirish haqidagi arizasini ma’qullamaydi. Bu haqda Yevroparlamentning polshalik deputati Yatsek Sariush-Volskiy ma’lum qildi, u yetakchi fraksiya — Yevropa xalq partiyasi vakilidir.
“Saakashvili va Gruziyaning YIga qo‘shilish istiqbollari o‘rtasidagi bog‘liqlik prinsip jihatidan qat’iydir! Ikkala holatni ajratib bo‘lmaydi. Agar sobiq prezident hibs ostida qolib, qamoqda vafot etsa, Yevroparlament hech qachon Gruziyaning Yevroittifoqqa qabul qilinishini yoqlab ovoz bermaydi”, — deb yozdi Sariush-Volskiy Twitter’da.
Gruziya 3-mart kuni — Moldova bilan bir vaqtda va Ukrainadan keyin ikki kun o‘tib, Yevroittifoqqa a’zolik uchun ariza bergan edi. Iyunda Yevrokomissiya Gruziyaga nomzod maqomini olish bo‘yicha tavsiyalar berishdan bosh tortdi va u muayyan shartlarni bajarganidan keyingina nomzod maqomini olishini aytdi.
Gruziyaning sobiq prezidenti qamoqxonada ikki marta ochlik e’lon qilish aksiyasi tufayli sog‘lig‘i yomonlashgani uchun 2022-yil may oyi o‘rtalaridan buyon Tbilisidagi “Vivamed” klinikasida yotibdi. Mixail Saakashvili derazalari panjarali palatada va qurollangan qo‘riqchilar nazoratida saqlanmoqda.
Avvalroq Ukraina prezidenti ofisi rahbari Mixail Podolyak Ukraina tomoni qamoq jazosini o‘tayotgan Gruziyaning sobiq prezidenti Mixail Saakashvilini qabul qilishga tayyorligini ma’lum qilgan edi. Podolyakning so‘zlariga ko‘ra, Kiyev Saakashvilining xavfsizligini ta’minlashga va uni davolashga tayyor.
Sobiq prezident 2021-yil 1-oktabrda Gruziyada hibsga olingan, unga nisbatan bir qancha jinoiy ishlar bo‘yicha tergov harakatlari olib borilmoqda. Siyosatchi bankir Sandro Girgvliani o‘ldirilishi va deputat Valeriy Gelashvilining kaltaklanishi ishlari bo‘yicha sirtdan sudlangan. Birinchi holatda Saakashvili uch yilga, ikkinchisida olti yilga ozodlikdan mahrum etilgan.
Bundan tashqari, u 2007-yil 7-noyabrdagi muxolifat mitingini tarqatib yuborish, “Imedi” telekompaniyasining pogromi va davlat byudjeti mablag‘larini o‘g‘irlash ishlarida ayblanuvchi deb topilgan va bu ayblovlar hali ham sudda ko‘rib chiqilmoqda.
Bosh vazir Irakliy Gariboshvili, Mixail Saakashvilini uzoq vaqt qamoqda qolishi hamda butun jazo muddatini o‘tashini ta’kidlagan.
Izoh (0)