Ukrainada fevraldan buyon 702 ta muhim infratuzilma obyektlariga zarar yetgan, deya ma’lum qildi mamlakat ichki ishlar vaziri o‘rinbosari Yevgeniy Yenin. U bunda 24-fevraldan beri harbiy operatsiya olib borayotgan Rossiyani aybladi.
Vazir o‘rinbosari ma’lumotlariga ko‘ra, Ukrainada jami 35 mingta obyekt zarar ko‘rgan. “Gap, xususan, gaz quvurlari, elektr quyi stansiyalari, ko‘priklar va boshqalar haqida bormoqda”, — dedi Yenin telemarafon efirida.
Bundan bir oy avval, 27-noyabr kuni vazir o‘rinbosari 32 mingta obyekt va 700 dan ortiq muhim infratuzilma obyektlari zarar ko‘rganini aytgandi.
Ukraina 27-dekabr kuni 2023-yil fevral oxiriga qadar BMT doirasida “tinchlik sammiti”ni o‘tkazish tashabbusi bilan chiqdi. Vositachi sifatida Kiyev BMT bosh kotibi Antoniu Guterrishni ko‘rishni xohlaydi. Ukraina tashqi ishlar vaziri Dmitriy Kuleba Rossiya “harbiy jinoyatlari uchun javobgarlikka tortilganidan keyingina” uchrashuvga taklif qilinishi mumkinligini aytdi.
Oktabr oyi boshidan beri Rossiya Mudofaa vazirligi Ukrainaning harbiy va energetika infratuzilmasiga muntazam raketa zarbalari berib kelmoqda. Hujumlarda Rossiya Erondan sotib olgan dronlardan ham foydalanmoqda.
Rossiya harbiylari 27-dekabr kuni Xersondagi kasalxonaning tug‘ruq bo‘limini o‘qqa tutdi, 24-dekabr kuni esa ular Xersonda, jumladan, ikkita tibbiyot muassasasiga zarba bergandi.
Izoh (0)