Kadis ko‘rfazida Ispaniya politsiyasi bojxona organlari va jinoyatga qarshi kurash agentligi xodimlari bilan birgalikda bortida 4 tonnadan ortiq gashish bo‘lgan Britaniya yelkanli kemasini qo‘lga oldi. Bu haqda Ispaniya Milliy politsiya saytida xabar berildi.
Idora ma’lumotlariga ko‘ra, kema Marokashning g‘arbiy qirg‘oqlari tomon yo‘l olgan, biroq Gibraltar bo‘g‘ozidagi noqulay ob-havo sharoiti tufayli Ispaniya suvlariga qaytishga majbur bo‘lgan.
Ispaniyadagi huquq-tartibot idoralari Britaniya rasmiylari tomonidan shubhali yelkanli kema haqida avvalroq ogohlantirilgan edi. Tekshiruv davomida aniqlanishicha, narkotik moddalar keyinchalik Janubiy Amerikaga jo‘natish uchun Marokashga yetkazilishi kerak bo‘lgan.
Yelkanli kema Kadis shahridagi yaxtalar turadigan joyda topilganidan keyin kuzatib borilgan. Kema bo‘rondan panoh topish uchun Ispaniya suvlariga qaytganida, unga bojxona patrul kemasi yaqinlashgan. Bojxonachilar kema bortida ko‘p sonli qoplarni topgach kema Kadis portiga olib ketilgan. U yerda tintuv chog‘ida 130 dona o‘ram topilgan, ular ichida 4,4 tonnaga yaqin gashish smolasi bor edi.
Ikki ekipaj a’zosi hibsga olindi, biroq tergov hali ham davom etmoqda, yana hibsga olishlar bo‘lishi mumkin, deb ma’lum qildi politsiya.
Izoh (0)