AQSH Kongressining Vakillar palatasi TikTok’dan foydalanishni taqiqladi

AQSH Kongressining Vakillar palatasi qonun chiqaruvchi organ a’zolari va xodimlariga ish qurilmalarida Xitoyning TikTok ijtimoiy tarmog‘idan foydalanishni taqiqladi. Bu haqda “Amerika ovozi” nashri xabar berdi.

Nashr xabariga ko‘ra, tegishli bildirishnoma Vakillar palatasining Ma’muriy masalalar qo‘mitasi tomonidan yuborilgan. “Kiberxavfsizlik apparati TikTok mobil dasturi bir qator xavfsizlik tahdidlari tufayli foydalanuvchilar uchun yuqori xatarga ega, degan xulosaga keldi”, — deyiladi elektron pochta xabarida.

Xatda aytilishicha, ish qurilmalariga TikTok’ni o‘rnatgan foydalanuvchi dasturni o‘chirib tashlaydi va kelajakda ham uni yuklab olish taqiqlanadi.

Avvalroq AQSH Senati davlat xodimlariga federal hukumat elektron qurilmalarida TikTok’dan foydalanishni taqiqlovchi qonun loyihasini bir ovozdan ma’qullagan edi.

“TikTok — bu Xitoy Kommunistik partiyasining troya oti. Bu AQSH xavfsizligi uchun jiddiy tahdid. Ijtimoiy tarmoq Xitoy bilan aloqalarni butunlay uzmaguncha, hukumat qurilmalarida unga o‘rin yo‘q ”, — degan respublikachi senator Josh Xouli qonun loyihasini Senatga kiritar ekan.

16-dekabr kuni AQSH Markaziy razvedka boshqarmasi (MRB) direktori Uilyam Berns Amerika razvedkasi TikTok AQSH milliy xavfsizligiga tahdid solayotganiga ishonishini aytdi. Uning fikricha, Xitoy rasmiylari Amerikadagi TikTok foydalanuvchilarining shaxsiy ma’lumotlarini olish, shuningdek, ushbu ijtimoiy tarmoqda qanday turdagi materiallar joylashtirilishini nazorat qilish “qobiliyatiga ega”.

TikTok Xitoyning ByteDance kompaniyasiga tegishli bo‘lib, kompaniya Xitoy rasmiylari bilan hamkorlikda ekani haqidagi shubhalar tufayli AQSHda unga nisbatan da’volar mavjud.