Украина халқи АҚШ томонидан қурол-яроғ ва пул билан таъминланиб турсагина жанг қила олади. Сулҳ масаласи гўёки Вашингтонга боғлиқ. Бу ҳақда Венгрия бош вазири Виктор Орбан Magyar Nemzet нашрига берган интервьюсида айтиб ўтди.
Венгриялик мансабдор таъкидлашича, Будапешт 30 йил ичида биринчи марта Украинадаги урушга аралашиб қолиш хавфига дуч келган. Унинг фикрича, ёнилғи нархининг ошиши ҳам «мамлакатни хавфли йўналишга бошламоқда».
Шунингдек, у урушда аввал ўт очишни тўхтатиб, шундан кейингина тинчлик музокараларини ўтказиш кераклигини айтди. Аммо Орбан бу масалага алоҳида тўхталиб, аниқлик киритди.
«АҚШ пул ва қурол билан ёрдам бериб турсагина, Украина жанг қилишни давом эттира олади. Америкаликлар тинчликни хоҳласагина, тинчлик бўлади», — деган фикрда Венгрия ҳукумати раҳбари.
Шунингдек, у Венгриянинг ўз алоҳида позицияси борлигини айтди. «Биз воқеанинг яхши томонида турибмизми ёки ёмон томонида турибмизми — деган саволга жавоб берадиган бўлсак, айтишимиз мумкинки, биз венгерча томонда турибмиз», — деди у.
Шу билан бирга, Орбан Будапешт Украинани қўллаб-қувватлаб, унга ёрдам бераётганини таъкидлади. «Биз суверен Украина омон қолиши тарафдоримиз ва Россия Европа хавфсизлигига таҳдид солмаслигидан манфаатдормиз. Аммо биз Россия билан иқтисодий алоқаларимизнинг барчасидан воз кечишдан манфаатдор эмасмиз», — деди Орбан.
Эслатиб ўтамиз, 7 декабрь куни Евроиттифоқ мамлакатлари вакиллари ўртасидаги учрашув чоғида Венгрия томони Россияга қарши санкцияларнинг янги пакетига қарши чиққан эди.
Изоҳ (0)