Fransiya uchun asosiy ustuvor vazifa — bu Rossiyaga xavfsizlik kafolatlarini berish emas, balki Ukrainani himoya qilish, dedi prezident Emmanuel Makron Le Monde nashriga bergan intervyusida.
Moskva va Kiyev o‘rtasidagi potensial tinchlik shartnomasining Rossiyaga xavfsizlik kafolatlari berish bandi haqidagi savolga Makron “Bu ustuvor maqsad emas. Bu vaqt o‘tishi bilan paydo bo‘ladigan narsalardan biri” deb javob qaytardi.
Makronning fikricha, Rossiya hozir sulhga tayyor emas. “Rossiya boshidanoq so‘ragan narsa tinchlik emas, taslim qilish edi”, — dedi Fransiya rahbari. “Parij esa Ukraina g‘alabasiga, Ukrainani mutlaq himoya qilish strategiyasiga amal qiladi”.
2021-yil oxirida Rossiya xavfsizlik kafolati loyihasini tayyorlab, AQSH va NATOga o‘z takliflarini taqdim etgan edi. Hujjatda, xususan, sobiq SSSR davlatlarini alyansga qabul qilmaslik va ularning hududida harbiy bazalarni joylashtirmaslik so‘ralgan. Vashington va Shimoliy Atlantika alyansi bilan kafolatlar bo‘yicha olib borilgan muzokaralar aniq natija bermadi. 24-fevral kuni esa Rossiya Ukrainaga qarshi urush boshladi.
Mojaro boshida Rossiya va Ukraina delegatsiyalari muzokaralar olib bordi, biroq bahorda ular muzlatib qo‘yildi. Moskva Kiyevni muloqotga chaqirmoqda, ammo Ukraina prezidenti Vladimir Zelenskiy Rossiya tomoni tinchlikni emas, balki “qisqa muddatli sulh”, o‘zini tiklab olish uchun muhlat istayapti, deb hisoblamoqda.
Dekabr oyi boshida Makron Ukrainadagi urush tugaganidan so‘ng Yevropa yangilangan xavfsizlik arxitekturasini qurishi kerakligini, bu jumladan, Rossiya uchun kafolatlar berishni ham o‘z ichiga olishini aytgandi. Makronning bunday bayonotidan so‘ng Boltiqbo‘yi mamlakatlari va Yevropa Ittifoqining boshqa davlatlari rasmiy norozilik e’lon qildi. Reuters ma’lumotlariga ko‘ra, Latviya, Litva, Estoniya, Slovakiya va Polsha rasman Parij pozitsiyasiga qarshi chiqqan.
Izoh (0)