Germaniya prokuraturasi Federal razvedka xizmati xodimini Rossiya razvedkasiga maxfiy ma’lumotlarni uzatishda gumon qilib, qo‘lga oldi. Bu haqda Bosh prokuratura xabar bermoqda.
FRX xodimi Karsten L. 16-dekabr kuni hibsga olingan, u Rossiya razvedkasiga ma’lumotlar uzatib, davlatga xiyonat qilishda ayblanmoqda. Gumonlanuvchining uyida va ish joyida tintuvlar o‘tkazildi. 22-dekabr kuni sud Karsten L.ni keyingi sud majlisigacha hibsga olish haqida qaror chiqardi.
FRX rahbari Bruno Kal Handelsblatt gazetasiga ma’lum qilishicha, josusni xizmat xodimlari ichki tekshiruv chog‘ida aniqlagan. Uning aytishicha, bu ishda “vazmin va ehtiyotkor” bo‘lish muhimdir, chunki FRX Rossiya bilan ish ko‘rmoqda, uning “prinsipsizligi va zo‘ravonlikka moyilligi esa muqarrardir”.
Germaniya konstitutsiyasini himoya qilish bo‘yicha federal idora va FRX harbiy operatsiya boshlanganidan keyin Rossiya razvedkasining josuslik faoliyati kuchayishini kutgan edi, shu sababli Ukraina va Rossiya o‘rtasidagi nizoning eng boshidayoq Germaniya Rossiya elchixonasining o‘nlab xodimlarini maxsus xizmatlarga ishlashda gumon qilib, mamlakatdan chiqarib yuborgan edi, deb yozadi nashr.
Izoh (0)