Italiya bosh vaziri Jorjiya Meloni italiyaliklarni Ukraina bilan birdamlik sifatida har kuni bir soatga energiya manbalarini o‘chirishga chaqirdi. Bu haqda Reuters xabar bermoqda.
“Ukrainaliklar nimalarni boshidan kechirayotganini tushunish uchun barcha italiyaliklardan kuniga bir soatga energiya manbalarini o‘chirishni so‘rayman”, — dedi Meloni.
Shuningdek, uning “Italiya Birodarlari” partiyasi “vataniga muhabbat va o‘z erkinligini himoya qilayotgan” ukrainaliklarga hurmat bajo keltirgan.
10-oktabrdan buyon Rossiya Ukraina energetika infratuzilmasiga zarbalar berib kelmoqda. 16-dekabr kuni Ukraina hukumati Kiyev, Xarkov, Nikolayev, Dnepropatrovsk va Ternopol viloyatlaridagi portlashlar haqida xabar berdi. “Ukrenergo” elektr energiya tizimi operatori favqulodda vaziyat haqida e’lon qildi. Oxirgi marta zarbalar 19-dekabr kuni berildi.
Avvalroq Ukraina prezidenti Vladimir Zelenskiyning rafiqasi Yelena Zelenskaya Ukraina aholisining katta qismi Yevroittifoqqa a’zo bo‘lish uchun chiroqsiz va issiqlik ta’minotisiz yashashga tayyorligini aytgandi. Uning qayd etishicha, ukrainaliklar nimani deb sabr qilishni biladi va o‘z mamlakati kelajagiga optimizm bilan qaraydi.
Izoh (0)