Ikki nafar amerikalik astronavt 22-dekabr kuni Xalqaro koinot stansiyasi (XKS) bortidan ochiq koinotga chiqib, uning yuzasiga yangi quyosh panelini o‘rnatdi va uni energiya ta’minoti tizimiga uladi, deb xabar bermoqda NASA.
Astronavtlar Frenk Rubio va Josh Kassada IROSA quyosh panellarini o‘rnatgan, ular allaqachon elektr energiyasi yetkazib berishni boshlagan. Ikkita yangi panel XKSga 27-noyabr kuni Amerikaning SpaceX kompaniyasining Cargo Dragon yuk kemasi orqali yetkazilgan edi. Ulardan birinchisi 3-dekabr kuni o‘rnatilgan.
IROSA panellarining dastlabki bir jufti o‘tgan yil iyunida astronavtlarning fazoviy vakuumga uch marta chiqib kelishi natijasida o‘rnatilgandi. XKS energetika tizimini modernizatsiya qilish doirasida stansiyaga jami uch juft yangi panellar qo‘shilishi kerak.
Ushbu panellar stansiya faoliyatini ta’minlash uchun elektr energiyasini 30 foizga ko‘proq ishlab chiqarish imkonini beradi. Ular sakkizta eski panellar yoniga o‘rnatiladi, natijada stansiya energiya tizimi tuvvati 160 dan 215 kilovattgacha oshadi.
NASA qayd etishicha, XKSdagi avvalgi sakkizta quyosh paneli hozircha normal tarzda ishlamoqda, ammo ular asta-sekinlik bilan ishdan chiqib boradi, chunki ularning xizmat muddati 15 yilga mo‘ljallangan. Panellarning eng birinchilari stansiyaga o‘rnatilganiga 20 yildan oshgan.
Ayni paytda XKS ekipaji tarkibiga rossiyalik kosmonavtlar Sergey Prokopyev, Dmitriy Petelin, Anna Kikina, amerikalik astronavtlar Frenk Rubio, Josh Kassada, Nikol Man hamda Yaponiya aerokosmik tadqiqotlar agentligi astronavti Koiti Vakata kiradi.
Izoh (0)