AQSH Kongressi Senati 2023-yilgi budjet loyihasiga rossiyalik tadbirkorlarning aktivlarini Ukraina foydasiga musodara qilish to‘g‘risidagi bandni kiritdi. Bu haqda AQSHning Yevropada xavfsizlik va hamkorlik bo‘yicha komissiyasi katta siyosiy maslahatchisi Pol Massaro ma’lum qildi.
“AQSH Senati musodara qilingan oligarx aktivlarini Ukrainaga yuborishni bir ovozdan ma’qulladi”, — deb yozgan Massaro Twitter’da.
Budjetga bunday tuzatish kiritishni respublikachi senator Lindsi Grem taklif qilgan. “Ushbu tuzatish Adliya vazirligiga Davlat kotibi orqali oligarxlar yoki sanksiyalar ostidagi boshqa tashkilotlarning musodara qilingan aktivlaridan tushgan mablag‘larni Ukraina xalqiga o‘tkazish imkonini beradi”, — dedi Grem CNN telekanaliga.
Ukrainada urush boshlanganidan keyin Yevropa Ittifoqi davlatlari, AQSH va ularning ittifoqchilari ayrim rossiyalik tadbirkor va kompaniyalarning aktivlarini bloklashni boshladi. Ukraina hukumati Rossiyaning muzlatilgan aktivlarini mamlakatning harbiy harakatlardan zarar ko‘rgan hududlarini tiklashga o‘tkazish tashabbusi bilan chiqdi.
Yevrokomissiya rahbari Ursula fon der Lyayen muzlatilgan 300 milliard yevrolik Rossiya aktivlari va rossiyaliklarning 19 milliard yevrolik shaxsiy aktivlaridan maxsus jamg‘arma yaratishni taklif qildi. U Rossiya bilan mojarodan Ukrainaga yetkazilgan zararni 600 milliard yevroga baholagan. Shu bilan birga, WSJ manbalarining ta’kidlashicha, Yevropa Ittifoqi xalqaro davlat immuniteti prinsipi tufayli Ukrainaga muzlatilgan aktivlarini jo‘nata olmasligi mumkin.
Mavzuga doir: Polsha bosh vaziri Ukrainani Rossiya hisobidan tiklashni taklif qildi
Izoh (0)