F-15 qiruvchisi va razvedkachi samolyot hamrohligida: Zelenskiy Vashingtonga qanday yetib olgani ma’lum bo‘ldi

Ukraina prezidenti Vladimir Zelenskiy Vashingtonga qay tarzda yetib olgani ma’lum bo‘ldi, deb yozadi BBC.

Zelenskiyni Ukrainadan AQSH poytaxtiga olib kelish uchun favqulodda xavfsizlik choralari ko‘rilgan. Bu ikkala mamlakat o‘zaro munosabatlarini qanchalik qadrlashidan guvohlik beradi, deyiladi xabarda.

20-dekabr, seshanba kuni Zelenskiy Baxmutdagi front chizig‘iga borgan, keyin esa tungi poyezdda Polshaga yo‘l olgan. Shu tariqa uning Vashingtonga uzoq safari boshlangan. Polshada uni darhol AQSH Harbiy-havo kuchlari samolyoti olib ketgan, unga, xabarlarga ko‘ra, NATOning razvedkachi samolyoti va F-15 qiruvchisi hamrohlik qilgan.

Rossiya raketalari tahdidi tufayli, Ukraina osmonida parvoz qilish o‘ta xavflidir, shu sababli, Zelenskiy maxfiy ravishda Ukrainadan Polshaga poyezdda yetib olgan. 21-dekabr, chorshanba kuni tongda uni chegaradagi Pshemisl shahrida temir yo‘l stansiyasida ko‘rishgan.

Zelenskiy Ukrainaga qaytishda ham, katta ehtimol bilan, shu yo‘nalishda harakatlanib, yana Polsha orqali o‘tgan. Chunki u AQSHdan qaytishdan polshalik hamkasbi Anjey Duda bilan uchrashgani xabar berildi.

Prezidentlar Polshaning Jeshuv shahrida ko‘rishdi, u yerda Duda rafiqasi Agata bilan birga Rojdestvo arafasida askarlar va ofitserlar bilan muloqot qilgan edi. Zelenskiy va Duda 2022-yil yakunlarini va Rossiya harbiy operatsiyasini muhokama qildi. Ukraina mudofaa qobiliyatini kuchaytirish va gumanitar masalalarga urg‘u berildi.

Eslatib o‘tamiz, 21-dekabr kuni Zelenskiy AQSHga kelib, Amerika prezident Jo Bayden bilan uchrashdi. Qo‘shma matbuot anjumanida Zelenskiy Kiyev va Vashington aloqalarida haqiqiy ittifoqchilik bosqichi boshlanganini aytdi va Patriot tizimlarini o‘z ichiga oluvchi yangi yordam paketini “ajoyib yangilik” deb atadi. Ukraina prezidenti AQSH Kongressi 45 milliard dollarlik yordam paketini ma’qullashiga umid bildirdi.

Avvalroq AQSH hukumati Ukraina prezidenti Vladimir Zelenskiyning Vashingtonning tashrifi chog‘ida uning hayotiga suiqasd uyushtirilishi ehtimolidan tashvishlanib, xavfsizlik choralarini kuchaytirgani xabar berilgan edi. Manbaga ko‘ra, bunday xavf Rossiya tomonidan kelmoqda, va shu munosabat bilan, yuqori mansabli hukumat amaldorlari, shuningdek, AQSHdagi elchixona xodimlari Zelenskiyning bo‘lajak tashrifi haqida oldindan xabardor qilinmagan.

Zelenskiyning Vashingtonga tashrifi haqida birinchi bo‘lib CNN telekanali manbalariga tayanib xabar qilgandi, u haqda oldindan e’lon qilmagandi. Keyinroq Oq uy va Ukraina yetakchisining o‘zi ham tashrifni tasdiqladi.