Америка Урушни ўрганиш институти (ISW) ўз кундалик шарҳида Владимир Путиннинг Россия гўёки Украинадаги урушни имкон қадар тезроқ тугатишни хоҳлаётгани, аммо «беҳуда йўқотишлар»нинг олдини олиш учун жанговар ҳаракатлар суръатини кучайтирмоқчи эмаслиги ҳақидаги сўнгги баёнотларига эътибор қаратди.
ISW таҳлилчиларининг фикрича, бу баёнотлар Россиянинг нореал мақсадларига эришиш учун тобора кўпроқ қурбон беришга мажбур бўлаётган маҳаллий рус аудиториясига Путиннинг қимматга тушган урушини оқлаш бўйича Кремль саъй-ҳаракатларининг бир қисми.
Таъкидланишича, Россия ҳарбийлари 3 июль куни Лисичанск бой берилганидан буён Украинада ҳеч қандай муҳим ғалабага эришмаган. Путин ва Мудофаа вазирлиги расмийлари сўнгги кунларда ҳарбий муваффақиятсизликлар учун бир неча бор ноаниқ баҳоналар келтирди.
Путин масъулиятни тўнкамоқчи бўлганлардан бири — Россия Қуролли кучлари Бош штаби бошлиғи Валерий Герасимов, дейди ISW мутахассислари. У яқинда узоқ танаффусдан сўнг биринчи марта телевизорда кўрсатилган.
«Кремль қарийб ўн ой давомида Герасимовни оммага кўрсатмади», — дейилади хабарда. Бош штаб раҳбарининг жамоат олдида пайдо бўлиши, ISW маълумотларига кўра, уни «ушбу уруш учун масъул бўлган навбатдаги шахс» сифатида кўрсатишга уринишлар билан боғлиқ бўлиши мумкин.
Путин Украинадаги ҳарбий муваффақиятсизликлар учун жавобгарликни ўзидан соқит қилмоқчилиги ҳақида аввал Британия разведкаси ҳам хабар берганди.
Мавзуга доир:
Изоҳ (0)