Ukraina prezidenti Vladimir Zelenskiy 20-dekabr kuni Donbassdagi front chizig‘ida joylashgan Baxmut shahriga tashrif buyurdi.
Prezident oldingi chiziqni borib ko‘rdi, harbiylarni nishon va qimmatbaho sovg‘alar bilan taqdirladi. Zelenskiyga tashrif davomida Ukraina mudofaa vaziri o‘rinbosari Anna Malyar ham hamrohlik qildi.
Ukraina rahbari mamlakatdagi elektr energiyasi bilan bog‘liq vaziyatga ham izoh berdi. U ahvol og‘irligi, ammo davlat rahbari, armiya, yurt va har kimning ichidagi umid uchquni vaziyat yomon emasligiga ishora qilishini aytdi.
“Davlat rahbari qo‘mondonning tezkor vaziyat, moddiy-texnik ta’minot va kelgusidagi harakatlar bo‘yicha taklifi haqidagi ma’ruzasini tingladi. Shuningdek, harbiy xizmatchilarga mukofotlar topshirdi”, — deydi prezident matbuot kotibi Nikiforov.
Zelenskiy o‘zining Telegram sahifasida Baxmutga tashrifidan rasmlar joylab, uning ostida quyidagicha izoh qoldirgan:
“Baxmut qal’asi. Bizning xalqimiz. Dushman tomonidan mag‘lub etilmagan. Ular o‘zlarining jasorati bilan jangga bardosh berishimizni va yengilmasligimizni isbotlaydi.
Ukraina siz bilan faxrlanadi. Men siz bilan faxrlanaman! Dushman hujumlarini qaytarishda ko‘rsatilgan jasorat, chidamlilik va kuch uchun rahmat”, — deydi prezident.
Baxmut Ukraina prezidenti jang bo‘layotgan hududga tashrif buyurgan birinchi shahar emas, xususan, Zelenskiy 6-dekabr kuni Donetsk viloyatining Slovyansk shahriga tashrif buyurgandi. 14-noyabr kuni esa o‘qqa tutilgan Xersonga borgan.
Baxmut shahri (2016-yilgacha — Artemўvsk) Donbassdagi muhim transport markazi, Ukrainaning mustahkamlangan hududi hisoblanadi. U Kramatorsk, Slavyansk, Seversk va Toretskgacha bo‘lgan yo‘llarni qamrab oladi. May oyining ikkinchi yarmidan boshlab rus qo‘shinlari shaharga kuchli raketa hujumlarini amalga oshirmoqda.
5-iyul kuni rus qo‘shinlari Lisichanskni egallab oldi va avgustda ular Baxmutning chekka hududlariga yetib keldi. Yoz oxiridan beri ruslar, asosan, “Vagner” xususiy harbiy kompaniyasi kuchlari, bir necha kilometr oldinga siljishga muvaffaq bo‘ldi.
Bir necha oydirki, shahar chekkasida shiddatli janglar davom etmoqda. Shu bilan birga, Baxmutda tinch aholi hayot kechirmoqda. Shahar hali ham Ukraina harbiylari tomonidan himoyalangan.
Izoh (0)