Zelenskiy Donbassga tashrif buyurib, harbiylar bilan uchrashdi (video)

Ukraina prezidenti Vladimir Zelenskiy Donetsk viloyatining Slovyansk shahriga tashrif buyurdi va ukrainalik himoyachilarni 6-dekabr — Ukraina Qurolli kuchlari kuni bilan tabrikladi. Davlat rahbari o‘zining videomurojaatini ijtimoiy tarmoqlarda e’lon qildi.

“Hurmatli himoyachilar, davlatimizni kecha-yu kunduz, ayozda, ish kuni va bayramlarda himoya qilmoqdasiz. Har kuni sizning jasoratingizni eslaymiz va ishingizga yordam beramiz”, — degan Zelenskiy.

Prezident bugungi kunni Ukraina harbiylari bilan birga Donbassdagi frontda o‘tkazishini aytdi. U Ukraina Qurolli kuchlari safiga jalb qilingan barcha shaxslarning professionalligini aytib, davlatni himoya qilgani uchun ularga minnatdorlik bildirdi.

“Butun dunyo sizning kuchingizni, mahoratingizni, me’yorlaringizni — Ukraina standartlarini ko‘rib turibdi. Sizdagi qahramonlik uchun ota-onangizdan, rafiqangiz va bolalaringizdan minnatdorman. Butun Ukraina sizga ishonadi va yordam beradi”, — deya qo‘shimcha qildi Zelenskiy.

Prezident, shuningdek, ukrainalik himoyachilar Ukrainani ozod qilish uchun qiyin yo‘l bosayotganini aytdi. Unga ko‘ra, davlatning to‘liq mustaqilligiga erishish Donetsk, Lugansk va Qrimni ozod qilish hisoblanadi.

“Barcha harakatlar erkinlikka, barcha qadamlar g‘alabaga yetaklaydi”, — deya xulosa qildi u.

Mavzuga doir: Zelenskiy Ukraina Qrimni xoh harbiy, xoh diplomatik yo‘l bilan qaytarib olishga tayyorligini aytdi