Niderlandiya bosh vaziri Mark Ryutte mamlakatning quldorlik va uning oqibatlaridagi roli uchun uzr so‘radi. Uning Gaagadagi Milliy arxivda so‘zlagan nutqi hukumat sayti tomonidan e’lon qilindi.
“To‘g‘ri, hozir yashayotganlardan hech kim qulchilikda aybdor emas. Lekin shu narsa ham haqiqatki, Gollandiya davlati butun tarix mobaynida qullikka duchor qilingan odamlar va ularning avlodlariga yetkazilgan azob-uqubatlar uchun mas’uldir”, — dedi Ryutte. U “asrlar davomida Gollandiya davlati va uning vakillari” qulchilikni rag‘batlantirgani va undan manfaat olganini ta’kidladi.
Niderlandiya nomidan so‘ralgan uzr mamlakatning mustamlakachilik bilan bog‘liq o‘tmishi qayta ko‘rib chiqilayotgan bir paytda, shuningdek, kelasi yil quldorlik bekor qilinganiga 160 yil to‘lishi arafasida yangradi.
XVII asrda Niderlaniya va uning mustamlakasi bo‘lgan hududlar Niderlandiya mustamlaka imperiyasini tashkil qilgan. XVIII asrga kelib, u Gvianani, Indoneziyani hamda Hindiston, Seylon va Formoza orolidagi faktoriyalarni, shuningdek, boshqa hududlarni o‘z ichiga olgan edi.
1660—1670-yillarda Niderlandiya Shimoliy Amerikadagi yer-mulklarini, shu jumladan, hozirgi Nyu-Yorkni Buyuk Britaniyaga berib yubordi, XIX asrda esa uning foydasiga Seylondan va Janubiy Afrikadagi Kap mustamlakasidan voz kechdi.
Quldorlik 1863-yil iyuliga qadar mamlakat iqtisodiyotining bosh omillaridan biri bo‘lib kelgan.
Hozirda Niderlandiya tarkibiga Karib dengizidagi Bonayre, Sint-Estatius va Saba orollari, shuningdek, alohida maqom (o‘z-o‘zini boshqaruvchi davlat tuzilmasi)ga ega bo‘lgan Aruba, Kyurasao va Sint-Marten ham kiradi.
Niderlandiyada, boshqa Yevropa mamlakatlarida bo‘lgani kabi, mustamlakachilik o‘tmishi va quldorlik haqidagi bahslar 2020-yilda AQSHda Black Lives Matter harakati paydo bo‘lganidan keyin qaytadan boshlandi. Xususan, 2020-yil iyulida Niderlaniya Markaziy banki uning faoliyati sobiq mustamlakalarda qulchilikni qo‘llab-quvvatlash bilan bog‘liq bo‘lgan-bo‘lmaganini aniqlashga qaror qildi. Undan avvalroq esa Angliya banki o‘z ofisidan qul savdosiga aloqador rahabrlar portretlarini olib tashlashga qaror qilgandi.
Izoh (0)