KXDR yetakchisi Kim Chen Inning singlisi, Koreya Mehnat partiyasi Markaziy qo‘mitasi bo‘lim mudiri o‘rinbosari Kim Yo Chjon KXDR sun’iy yo‘ldoshlari sinovlari natijalari mamlakatning texnologik salohiyati yuqori emasligidan darak berishini da’vo qilayotgan chet ellik ekspertlarni tanqid qildi.
Avvalroq KXDR razvedkachi sun’iy yo‘ldoshni orbitaga chiqarish bo‘yicha sinovlarning yakuniy bosqichini amalga oshirib, Seul va Inchxon port shahrining fazodan olingan tasvirlarini e’lon qilgan edi.
Kim Yo Chjon Koreya Markaziy telegraf agentligi tomonidan tarqatilgan bayonotida aytishicha, xorij, shu jumladan, Janubiy Koreya mutaxassislarining Seul va Inchxon tasvirlari sun’iy yo‘ldoshdan olingan suratlar uchun o‘ta past sifatga ega ekani haqidagi fikrlariga qo‘shilmaydi.
“Tajribaviy kamera orqali olingan va gazetada bosib chiqarilgan ikkita fotosuratga qarab bizning sun’iy yo‘ldosh ishlab chiqarish va uni tayyorlash bo‘yicha imkoniyatlarimiz haqida qaror chiqarish o‘rinsiz va shoshma-shosharlik bo‘ladi, deb o‘ylamadingiz”, — dedi Kim Yo Chjon.
Shimoliy Koreya yetakchisining singlisi qayd etishicha, KXDR qit’alararo ballistik raketalar qaytadan atmosferaga kirishi uchun zarur bo‘lgan texnologiyalarga ega. “Buni tezda o‘zingiz ko‘rasiz va tushunib olasiz”, — deya qo‘shib qo‘ydi u.
Sinovlar 18-dekabr kuni amalga oshirilgandi. Sinov qurilmasi ortilgan eltuvchi raketa qariyb 500 km balandlikka uchirilgan edi. Qurilma ma’lumotlar uzatish uchun kameralar va zarur uskunalar bilan jihozlangandi. KXDRning koinotni o‘zlashtirish bo‘yicha davlat boshqarmasi bayonotiga ko‘ra, Pxenyan o‘zining ilk harbiy razvedkachi sun’iy yo‘ldoshini ishlab chiqishni 2023-yil apreligacha yakunlamoqchi.
Mavzuga doir:
Izoh (0)