AQSH Kongressi 2023-yil uchun davlat hisobidan 1,7 trillion dollar mablag‘ ajratish to‘g‘risidagi qonun loyihasini taqdim etdi. Shundan 44,9 milliard dollari Ukraina va NATO ittifoqchilariga yordam uchun mo‘ljallangan, deb yozmoqda Reuters.
Agentlikning ta’kidlashicha, 1,7 trillion dollarlik moliyalashtirish rekord darajadagi harbiy xarajatlarni o‘z ichiga oladi va 2022-yilgi qariyb 1,5 trillion dollardan sezilarli darajada ko‘p.
“Qonun loyihasi Ukraina va NATO ittifoqchilariga 44,9 milliard dollar miqdoridagi qo‘shimcha favqulodda yordamni o‘z ichiga oladi”, — deyiladi xabarda.
Senat va Vakillar palatasi rahbarlari qonun loyihasini qabul qilib, hafta oxirigacha AQSH prezidenti Jo Baydenga imzolash uchun yuborishni rejalashtirmoqda. Bir necha oy davomida demokratlar va respublikachilar harbiy va noharbiy dasturlarga qancha pul sarflash kerakligi haqida bahslashgan.
Keyingi hafta AQSHda 2023-moliya yili uchun rekord darajada — 858 milliard dollarlik mudofaa budjeti loyihasi ham qabul qilinadi, o‘tgan yili bu summa 740 milliard dollarni tashkil qilgandi.
Eslatib o‘tamiz, noyabr oyi oxirida Bayden Davlat departamenti rahbari Entoni Blinkenga Ukrainani harbiy qo‘llab-quvvatlash uchun qo‘shimcha 400 million dollargacha mablag‘ yuborishni topshirgandi.
Izoh (0)