Starlink Ukrainaga yana 10 mingdan ortiq terminallarni yetkazib beradi

Ukraina Amerikaning Space Exploration Technologies Corp. kompaniyasi bilan Starlink sun’oy yo‘ldoshlari uchun 10 mingdan ortiq terminallar yetkazib berish haqida kelishib oldi. Bu haqda Ukraina bosh vaziri o‘rinbosari, raqamli transformatsiya bo‘yicha vazir Mixail Fyodorov ma’lum qildi.

Uning so‘zlariga ko‘ra, terminallar yaqin oylarda yetkazib beriladi, to‘lov bo‘yicha yordam berishga esa bir nechta Yevropa mamlakatlari rozi bo‘lgan.

Bloomberg’ga bergan intervyusida Fyodorov SpaceX va uning rahbari Ilon Mask “muammolarga tezkorlik bilan javob qaytarayotgani” va Ukrainaga yordam ko‘rsatayotganini aytdi. Vazirning so‘zlariga ko‘ra, u amerikalik biznesmen bilan to‘g‘ridan to‘g‘ri muloqot qilgan. “Mask Ukrainani qo‘llab-quvvatlashda davom etishiga ishontirdi. Bizda katta ko‘lamli o‘chishlar bo‘lganida, o‘sha kuniyoq unga yozdim, u esa zudlik bilan javob qilib, bir qancha choralar ko‘rishga ham ulgurdi”, — dedi Mixail Fyodorov.

Uning aniqlik kiritishicha, Rossiya harbiy operatsiyasi boshlanganidan buyon Ukraina qariyb 22 mingta Starlink antennalarini qo‘lga kiritgan. Yangilarini yetkazib berish haqida shartnoma tuzilganicha yo‘q, biroq, vazir aniqlik kiritishicha, ba’zi Yevroittifoq davlatlari “to‘lovni bo‘lishishga tayyor”. U aynan qaysi mamlakatlar haqida gap borayotganini aytmadi, “ayni paytda barcha moliyaviy masalalar hal qilingan”ini qo‘shib qo‘ydi. Starlink antennalari elektr toki bilan ishlaydi, ammo generatorlardan yoki quvvatlash blokidan zaryad olishi mumkin.

Starlink tarmog‘i Ukrainada urush boshlanganidan keyin ko‘p o‘tmay ishga tushirilgan edi. Kommunikatsiya infratuzilmasi o‘qqa tutilishi sharoitida u mamlakat mudofaa qobiliyati uchun muhim ahamiyatga ega: undan ukrainalik harbiylar ham foydalanadi. Ayni vaqtda, kompaniya ko‘pchilik xizmatlarni bepul taqdim etmoqda.

SpaceX kuz boshida Pentagondan Ukrainada Starlink’ni moliyalashtirishni o‘z zimmasiga olishni so‘ragan, Mask xarajatlarni oyiga 20 million dollarga baholagan. Shundan keyin AQSH prezidenti ma’muriyati ittifoqdoshlar bilan Ukrainani sun’iy yo‘ldosh aloqasi bilan ta’minlash masalasini muhokama qilayotganini bildirgan. Biroq oktabr o‘rtalarida biznesmen Ukrainada aloqani bepul ta’minlashga va’da bergan.

Noyabr boshida Ukrainada moliyalashtirish bilan bog‘liq muammolar tufayli, 1,3 mingta Starlink terminallari ishlashdan to‘xtagani, bu Ukraina qurolli kuchlari uchun “ulkan muammo”ga aylangani xabar berildi. Keyinroq Ukraina Polsha hukumatidan Amerikaning SpaceX kompaniyasida ishlab chiqarilgan qo‘shimcha 1570 ta Starlink sun’iy yo‘ldosh terminallarini olgani ma’lum bo‘ldi.