“Tolibon” va Pokiston harbiylari o‘rtasida 15-dekabr kuni Spinboldak—Chaman chegarasida otishma yuz berdi. Pokiston senati a’zolari hujumga munosabat bildirdi. Bu haqda Aamaj news xabar berdi.
Pokiston Senatining tashqi ishlar qo‘mitasi rahbari Faruk Naik hujumni keskin qoraladi.
“‘Tolibon’dan bunday munosabatni kutmagan edik, ular bizga rahmat o‘rniga qurol bilan javob berishdi. Biz G‘arb irodasiga qarshi Afg‘onistonning (‘Tolibon‘) dunyodagi vakili sifatida harakat qilyapmiz. Ular esa, aksincha, bizga qarshi qurol ko‘tardi, bu juda achinarli”, — degan u.
Shuningdek, siyosatchi Afg‘oniston bilan chegaradagi mojarolar soni Hindiston bilan sharqiy chegaradagiga qaraganda oxirgi paytlarda ancha ko‘paygani, mamlakat “Tolibon”ga nisbatan siyosatini qayta ko‘rib chiqishi kerakligini ta’kidladi.
15-dekabr kuni “Tolibon” matbuot kotibi Zabihulloh Mujohid chegaradagi mojaro Pokiston harbiylari tomonidan boshlanganini aytdi. U Twitter’dagi sahifasida Pokiston askarlari Afg‘onistonning Spinboldak tumanida otishma sodir etib, jang boshlaganini yozdi. “Tolibon” har qanday muammoni muloqot yo‘li bilan hal qilishi, salbiy harakatlar va urushni bahona qilish tomonlarning hech biriga manfaatdor emasligini bildirdi.
Manbalarga ko‘ra, 15-dekabrdagi mojaro “Tolibon” bu hududda nazorat-o‘tkazish punkti o‘rnatmoqchi bo'lganidan keyin boshlangan. Ammo Pokiston harbiylari bunga qarshilik qilgan. Hodisa oqibatida 1 kishi halok bo‘lgani, 15 kishi esa yaralangan. Pokiston “Tolibon” artilleriyadan tinch aholiga qarata o‘q uzgani aks etgan videoni e’lon qilgan.
Bunday holat 11-dekabrda ham kuzatilgan, jumladan, “Tolibon” va Pokiston harbiylari o‘rtasida to‘qnashuv yuz bergandi. To‘qnashuv “Tolibon” chegara kuchlari Durand liniyasi yaqinida yangi post qurishni rejalashtirganidan keyin boshlangan.
Izoh (0)