Yevropa Ittifoqi Kengashi Ukrainadagi urush tufayli Rossiyaga qarshi to‘qqizinchi iqtisodiy va individual sanksiyalar paketini tasdiqladi. Bu haqda YI kengashi saytida xabar berildi.
To‘qqizinchi sanksiyalar to‘plamiga quyidagilar kiradi:
- harbiy-sanoat kompleksi bilan bog‘liq 168 ta rus kompaniyasiga cheklov kiritish;
- aviatsiya uchun dvigatellarni, shu jumladan dronlarni Rossiyaga eksport qilishni taqiqlash;
- “Perviy kanal”, “NTV”/“NTV-Mir”, “Rossiya-1” va “REN TV” telekanallarining eshittirish litsenziyasini bekor qilish;
- energetika va tog‘-kon sanoatiga qarshi sanksiyalar;
- ikki rus bankining mablag‘larini muzlatish;
- Butunrossiya bankining tranzaksiyalarini blokirovka qilish;
- Yevropa Ittifoqi fuqarolarining Rossiyadagi davlatga tegishli yoki davlat tomonidan nazorat qilinadigan har qanday kompaniyalar, tashkilotlar yoki organlarning boshqaruv a’zolari bo‘lishini taqiqlash;
- individual sanksiyalar (bayonotda ko‘rsatilmagan).
Avvalroq Reuters’ning diplomatik manbalari Yevroittifoq mamlakatlari sanksiyalarning to‘qqizinchi paketi bo‘yicha kelishuvga erisha olmaganini aytgandi. Agentlik ma’lumotlariga ko‘ra, muzokaralar ishtirokchilari kelishuvga yaqinlashgan, biroq ular ba’zi mamlakatlar, masalan, Polshaning noroziliklariga yechim topa olmagan.
Izoh (0)