«Толибон» ва Покистон ҳарбийлари ўртасида 15 декабрь куни Спинболдак—Чаман чегарасида отишма юз берди. Покистон сенати аъзолари ҳужумга муносабат билдирди. Бу ҳақда Aamaj news хабар берди.
Покистон Сенатининг ташқи ишлар қўмитаси раҳбари Фарук Наик ҳужумни кескин қоралади.
«‘Толибонъдан бундай муносабатни кутмаган эдик, улар бизга раҳмат ўрнига қурол билан жавоб беришди. Биз Ғарб иродасига қарши Афғонистоннинг (‘Толибон‘) дунёдаги вакили сифатида ҳаракат қиляпмиз. Улар эса, аксинча, бизга қарши қурол кўтарди, бу жуда ачинарли», — деган у.
Шунингдек, сиёсатчи Афғонистон билан чегарадаги можаролар сони Ҳиндистон билан шарқий чегарадагига қараганда охирги пайтларда анча кўпайгани, мамлакат «Толибон»га нисбатан сиёсатини қайта кўриб чиқиши кераклигини таъкидлади.
15 декабрь куни «Толибон» матбуот котиби Забиҳуллоҳ Мужоҳид чегарадаги можаро Покистон ҳарбийлари томонидан бошланганини айтди. У Twitter’даги саҳифасида Покистон аскарлари Афғонистоннинг Спинболдак туманида отишма содир этиб, жанг бошлаганини ёзди. «Толибон» ҳар қандай муаммони мулоқот йўли билан ҳал қилиши, салбий ҳаракатлар ва урушни баҳона қилиш томонларнинг ҳеч бирига манфаатдор эмаслигини билдирди.
Манбаларга кўра, 15 декабрдаги можаро «Толибон» бу ҳудудда назорат-ўтказиш пункти ўрнатмоқчи бўлганидан кейин бошланган. Аммо Покистон ҳарбийлари бунга қаршилик қилган. Ҳодиса оқибатида 1 киши ҳалок бўлгани, 15 киши эса яраланган. Покистон «Толибон» артиллериядан тинч аҳолига қарата ўқ узгани акс этган видеони эълон қилган.
Бундай ҳолат 11 декабрда ҳам кузатилган, жумладан, «Толибон» ва Покистон ҳарбийлари ўртасида тўқнашув юз берганди. Тўқнашув «Толибон» чегара кучлари Дуранд линияси яқинида янги пост қуришни режалаштирганидан кейин бошланган.
Изоҳ (0)