“O‘g‘il tug‘masang, onangnikiga ketasan”, “Xotinning o‘rni oshxonada”: Toshkentda uydagi zo‘ravonliklarga qarshi ijodiy loyiha o‘tkazilmoqda (foto)

Poytaxtda bo‘lib o‘tgan “Zo‘ravonlikka qarshi institutsional kurash. Mediada gender obrazlarni yaratish” mavzusidagi xalqaro konferensiya doirasida yirik loyiha amalga oshirilmoqda. Konferensiya Prezident administratsiyasi Ijro etuvchi apparatining kommunikatsiyalar va axborot siyosati sektori mudiri Saida Mirziyoyeva tashabbusi bilan o‘tkazildi.

Tadbir Milliy mass-mediani qo‘llab-quvvatlash va rivojlantirish jamoat fondi hamda Aholishunoslik sohasidagi BMT jamg‘armasining O‘zbekistondagi vakolatxonasi (UNFPA) tomonidan tashkil etildi. Tadbirda BMTning Jeneva bo‘limi bosh direktori Tatyana Valova ishtirok etdi.

Tadbirga tashrif buyurgan har bir inson zalga kirishdan oldin zo‘ravonlikka uchragan ayollarga hamda noto‘g‘ri qarashlar va eski xurofotlarni yengib, bu dunyoni o‘zgartirishga intilayotgan qizlarga bag‘ishlangan loyihaning guvohi va ishtirokchisiga aylandi.

Loyiha muallifi — dizayner, poytaxtdagi Novda kompaniyasining ijodiy direktori Ahmad Sobitov. G‘oya asosini zo‘ravonlik qurbonlarining yordam so‘rab qilgan murojaatlari yozilgan audioyozuvlarni vizuallashtirish tashkil etadi. Har bir shunday audioyozuv mashhur an’anaviy naqshlar ostida (atlas, adras, ikat va boshqalar). Dizaynerning so‘zlariga ko‘ra, bu yozuvlar zo‘ravonlik qurbonlarining yordam so‘rab qilgan murojaatlari aks etgan videolardan olingan.

Shuningdek, konferensiya zali xolida (kirish qismi)da stikerlar yopishtirilgan qizlarning fotosuratlari namoyish etiladi. Ularda xotin-qizlar ko‘p uchraydigan bir xil xurofotlar va xo‘rliklar yozilgan. Xususan, “Bo‘lajak farzandimiz o‘g‘il bo‘ladi. Aks holda, onangnikiga ketasan”, “O‘qiyman desang, qolib ketasan”, “Qiz bolaga sportning nima keragi bor? Idish-tovoq yuvishni bilsang, shuning o‘zi yetadi”, “Xotinning o‘rni oshxonada” kabi iboralar shular jumlasidan.

Anjuman ishtirokchilari yuz yillar davomida Markaziy Osiyo mamlakatlarida qizlarga nisbatan ishlatilgan qoliplar va yorliqlardan ozod qilish ramzi sifatida bu stikerlarni yirtib tashlashi kerak. Ahmad Sobitovning ijodiy loyihasi xalqaro forum ishtirokchilari va poytaxtning ijodiy hamjamiyatlari orasida katta qiziqish uyg‘otdi.